iklan

BAUCAU, HEADLINE, INKLUZAUN SOSIÁL, MUNISÍPIU

Governu asegura inkluzividade-sustentabilidade Ema ho Defisiénsia

Governu asegura inkluzividade-sustentabilidade Ema ho Defisiénsia

Servisu Solidariedade Sósial Munisípiu Baucau hamutuk ho World Vision Timor-Leste selebra loron aniversáriu mundiál Ema ho Defisiénsia iha Uma Dame, Vila Nova, sesta (10/11). Imajen Tatoli/Natalino Belo.

BAUCAU, 10 dezembru 2021 (TATOLI) –Selebrasaun aniversáriu Ema ho Defisiénsia ho tema Timor-Leste tenke asegura inkluzividade no sustentabilidade ba ema ho defisiénsia tanba importante mós iha prosesu kontrusaun Estadu.

Selebrasaun ne’e realiza tanba kooperasaun entre Servisu Solidariedade Sósial Munisípiu Baucau hamutuk no World Vision Timor-Leste (WVTL).

Diretór Servisu Sentru Solidariedade Sosiál Munisípiu Baucau (CCCMB, sigla portugés), Guido Ricardo Belo, esplika atividade ne’e atu resposta ba selebrasaun ema ho defisiensia ne’ebé tuir loloos monu ona iha loron 3 dezembru liubá.

“Nafatin fó mensajen ba públiku tuir tema ne’ebé iha katak inkluzividade no sustentabilidade, entaun hotu-hotu hola parte tantu ema ho defisiénsia hosi tipu oinoin, sinál sira la fora maibé hola parte mós ba prosesu dezenvolvimentu konstrusaun Estadu,” Guido hateten iha Uma Dame, Vila Nova, sesta ne’e. 

Diretór Servisu Sentru Solidariedade Sosiál Munisípiu Baucau, Guido Ricardo Belo. Imajen Tatoli/Natalino Belo.

Durante ne’e mós ema ho defisiensia asosia-aan iha organizasaun sira, liuliu atu tau atensaun ba ema ho defisiénsia iha prosesu konstrusaun estadu. Nune’e mós selebrasaun ne’e liuhosi sosiedade sivíl, governu, setór privadu atu garante ema ho defisiénsia nia inkluzividade no sustentabilidade.

“Promosaun no protesaun ba ema ho defisiénsia ba governu importante, liuliu Ministériu Solidariedade Sósial no Inkluzaun, hodi haree kestun ne’e sai pertinente ba governu ne’e rasik hodi promeve inkluzividade no garante sustentabilidade ba ema ho defisiénsia,” Guido akresenta.

Servisu solidariedade sosiál Baucau durante ne’e servisu hamutuk ho WVTL, Katilosa no Asosiasaun Difisiente Timor-Leste (ADTL) atu investe iha área prioridade ba nesesidade ema ho defisiensia iha Baucau atu dezenvolve kapasidade no abilidade.

Área prioridade mak hanesan fó formasaun ba ema ho defisiente matan kona-ba lee no hakerek letra braille atu asesu iha kampu traballu no promove família.

Responsável Organizasun Ra’es Hadomi Tikmor Oan (RHTO) no fasilitadora ema ho defisiénsia WVTL Baucau, Elisa Maria da Costa hateten, selebrasaun loron mundiál ba ema ho difisiénsia ne’e, atu loke hanoin katak ema ho difisiensia iha talentu bele mós promove iha futuru.

Elisa akresenta, sei iha diskriminasaun ba ema ho defisiénsia tanba konsidera labele ona atu dezenvolve-aan nune’e liuhosi selebrasaun refere konvida família sira atu motiva ema ho difisiénsia sira.

“Ema ho defisiénsia sei hetan diskriminasaun maka’as hosi família rasik, nune’e família sira-ne’ebé mak partisipa bele dehan ita-nia oan ne’ebé mak defisiénsia mós bele,” Elisa hateten.

Remata selebrasaun refere parte komisaun fahe nesesidade bázika hanesan hahan no bebidas ba ema ho defisiénsia hamutuk na’in-50 kompostu hosi minoridade to’o idozu.

Organizasun Ra’es Hadomi Timor Oan rejista ema ho difisiénsia iha munisípiu Baukau tuir área tarjetu WVTL nian hamutuk na’in-500.

Jornalista         : Natalino Belo

Editór               : Evaristo Soares Martins

iklan
iklan

Leave a Reply

iklan
error: Content is protected !!