Enkarregadu Negósiu Embaixada EUA, Thom Daley hamutuk ho Diretór Jerál Servisu Kooperativu MS, Marcelo Amaral, hatuur fatuur dahuluk konstrusaun fatin ICU iha HorEX, sesta (10/12). Imajen Tatoli Tatoli/Natalino Belo.

BAUCAU, 10 dezembru 2021 (TATOLI) — Enkarregadu Negósiu Embaixada Estadu Unida (EUA), Tom Daley no Ministéru Saúde (MS), sesta ne’e hatuur fatuk dahuluk ba konstrusaun Unidade Kuidadu Intensivu (ICU, sigla inglés) ne’ebé sei utiliza ba izolamentu Covid-19 iha Hospital Referál Eduardo Ximenes (HorEX) Baucau.

Konstrusaun ba fasilidade izolamentu iha Baucau finansia hosi Estadu Unida Amérika nune’e ajuda trata pasiente COVID-19 no ajuda hamenus dezafiu hirak-ne’ebé fasilidade saúde sira hasoru.

“Kontribuisaun ne’e reprezenta kompromisu Estadu Unida nian hodi hamriik hamutuk ho ami-nia parseiru timór-oan sira, ita hamutuk luta hasoru COVID-19,” Enkarregadu Negósiu Embaixada Estadu Unida, Tom Daley ko’alia iha HorEX ,Vila Nova.

Tom Daley lori naran EUA hato’o obrigadu ba Governu Timor-Leste liuhosi MS ba parseria forte iha luta hasoru pandemia nune’e bele hahú rekuperasaun ekonómika no harii futuru ne’ebé seguru no prósperu liután ba sidadaun hotu-hotu.

Estadu Unida Amérika liuhosi Ajénsia Estadu Unida ba Dezenvolvimentu Internasionál (USAID, sigla inglés) no Komandu Indo-Pasífiku Estadu Unida halo parséria hamutuk ho Ministériu Saúde hodi haluan fasilidade izolamentu no kuarentena hodi hatán ba surtu COVID-19. 

Enkarregadu Negósiu Embaixada EUA Toma Daley hala’o intervensaun bainhira hatuur fatuk dahuluk konstrusaun fatin ICU iha HorEX, sesta (10/12). Imajen Tatoli/Natalino Belo.

Apoia ne’e nu’udar parte kontribuisaun Estadu Unida nian tanba iha fulan-setembru 2021 anunsia ona asisténsia adisionál millaun $2.3 hodi ajuda Timor-Leste luta hasoru COVID-19 no haforsa seguransa saúde, inklui harii fasilidade saúde ba salva vida nian.

Fundu ne’e fornese hosi misaun EUA iha Timor-Leste liuhusi USAID no Komandu Indo-Pasífiku liuhosi koraborasaun Korpu ba Pás. Nune’e mós kooperasaun ho The United Nations Children’s Fund (UNICEF).

“Apoiu finanseiru Estadu Unida nian ne’e sei ajuda konstrui fasilidade izolamentu iha Baucau, kontrui kapasidade ICU inklui fornese unidade ICU móvel ida ba Hospital Nacional Guido Valadares no fornese bee-moos ba iha fasilidade kuarentena Batugade nian,” Tom akresenta.

Durante pandemia, EUA serbisu hamutuk ho Governu Timor-Leste fornese ona vasina Pfizer hamutuk 100,000-resin no osan liu millaun $5.9 iha asisténsia importante luta hasoru COVID-19.

Xefe Kontrolu Kualidade no Komunikasaun Sosiál HorEX, Claudino Ximenes, sente kontente tanba ho konstrusaun ICU bele fasilita ona pesóal saúde atu atende pasiente sira-ne’ebé krítiku hosi munisípiu haat hanesan Lautém, Manatuto, Viqueque no Baucau.

“ICU ne’e mehi inísiu kedas bainhira HorEX harii, tanba ospitál ne’e estatutu rejionál hodi atende iha rejiaun leste nian,” Claudino hateten.

Durante ne’e pasiente sira-ne’ebé krítiku tenke transporta ba HNGV tanba menus fasilidade inklui fatin ICU ne’e rasik.

Hafoin lansamentu, tuir planu sei hahú konstrusaun iha semana-oin no sei finaliza iha inisiu tinan 2022 ho medida 12×9 kompleta ho sala haat.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here