Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Domingos Raul ‘Falur Rate Laek’ akompaña ho Embaixadór Austrália iha Timor-Leste, Peter Roberts, hasai foto hamutuk ho membru komponente Navál. Imajen/ Natalino Costa.

DILI, 09 dezembru (TATOLI)- Komandu FALINTIL-Forsa Defeza Timor-Leste (F-FDTL), kinta (09/12), ofisialmente atribui naran NRTL Aitana PIO1 no NRTL Laline PI02 ba ró patrollamentu rua ne’ebé apoia hosi Governu Austrália no sei to’o iha Timor-Leste iha 2023.

“Ita ofisialmente fó naran ba ró rua ne’ebé apoia hosi Governu Austrália ho naran Aitana no Laline. Tanba ita nia tradisaun no naran rua ne’e importante mós iha istória luta libertasaun Timor-Leste nian,” Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Domingos Raul ‘Falur Rate Laek’, hateten ba jornalista sira iha Komponente Navál Hera.

Majór Jenerál dehan antes ne’e Governu Portugál apoia ró, governu atribui naran Oé-cusse Atauro no ró rua ne’ebé sosa hosi Governu Xina hanaran Jaco no Betano.

Nune’e, Vise Xefe Estadu Maiór Jenerál F-FDTL konsidera ró rua ne’ebé apoia hosi Governu Austrália ba komponente Navál sufisiente atu halo kontrolu liuhosi patrollamentu iha tasi Timór nian.

“Ró ahi rua ne’e iha kapasidade atu halo patrollamentu iha tasi oseaníku. Nune’e ita agradese tebes Governu Austrália nia apoia,” Vise Xefe Estadu Maiór Jenerál F-FDTL agradese.

Iha biban hanesan, Embaixadór Austrália iha Timor-Leste, Petter Roberts, informa progresu konstrusaun  la’o hela no sei finaliza  hodi entrega ba F-FDTL iha tinan 2023.

Diplomata senior Australianu ne’e dehan, molok ró patrollamentu rua to’o, sei fó kapasitasaun ba forsa navál Timor-Leste atubele hala’o operasaun iha future.

“Austrália sei serbisu hamutuk ho Timor-Leste atu la’ós fó ró de’it, maibé oinsá atu fó treinamentu   manutensaun ba ró rua hodi bele uza ba tempu kle’ur.  Daudaun Timór-oan na’in tolu mak prepara ba tuir treinamentu,” nia informa.

Alende ne’e, Governu Austrália mós komprometidu atu apoia konstrui portu hodi fasilita ró patrollamentu hodi hala’o operasaun iha tasi mane no tasi feto ho di’ak. 

Jornalista  : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here