Prezidente Tribunál Rekursu, Deolindo dos Santos partisipa iha komemorasaun loron mundial anti korrupsaun ho tema “o nia direito, o nia papel, dehan lae korrupsaun. salaun Lalini Lariguto, CNE, Dili, Kinta (09/12). Imajen TATOLI/Egas Cristovão

DILI, 09 dezembru (TATOLI)— Komisáriu Komisaun Anti Korrupsaun (CAC, sigla Portugés), Sergio Hornai, hateten, prevene no kombate korrupsaun presiza asaun koletiva ho responsabilidade entre ajente Estadu no sidadaun hotu nian.

Komisáriu CAC hato’o kestaun ne’e iha ámbitu komemorasaun loron mundiál Anti Korupsaun ho tema “O nia direitu, O nia papél, dehan la’e ba korrupsaun”.

“Tema ba komemorasaun ne’e, inspira no fó atensaun ba entidade hotu atu kombate no prevene korrupsaun nesesáriu liu asaun koletiva no responsabilidade sidadaun hotu no ajente Estadu. Tanba kuandu tau hamutuk forsa, ita bele halo kontrolu mutual ba kombate korrupsaun,” Komisáriu CAC, hateten iha ámbitu seremonia komemorsaun loron mudíal Anti Korrupsaun ne’ebé hala’o iha salaun  Komisaun Nasionál Eleisaun (CNE sigla portugés), Colmera, kinta ne’e.

Iha tinan ida ne’e, Timor-Leste hahú daudaun implementa medida importante sira ba kombate korrupsaun hodi fó hanoin ba ajente Estadu liuliu funsionariu públiku sira no orgaun titulár sira kumpre nian direitu no dever atubele kontribui ba iha transparánsia no akontabilidade.

Tanba, Komisáriu KAK dehan, nuudar sidadaun moris iha país ne’e iha obrigasaun atu rekere direitu bainhira serbisu laiha remunerasaun no regalia sira, maibé Estadu no povu rekere mos resposabilidade nuudar servidór hodi serbisu ho profisional.

Iha biban hanesan, Prezidente Tribunál Rekursu, Deolindo dos Santos, hateten, korrupsaun ne’e mai hosi ema nia karakter individu, bainhira okupa kargu ba uzu patrimoniál ne’ebé tuir loloos la devia uza tuir nia hakarak.

“Kualker aktu ne’ebé sira halo kontra rasik sira konsénsia ne’ebé que dala barak foti osan no sasán ruma tanba deside tuir autoridade ne’ebé sira iha. Aktus hanesan ne’e mak impede ba prosesu dezenvolvimentu iha Timor-Leste,” nia akresenta.

Nune’e, Prezidente TR ne’e husu ba juiz sira labele simu subornu bainhira halo serbisu, nune’e bele kontribui ba prevensaun no kombate korrupsaun.

CAC rejista kazu 70-resin

Entertantu, tuir dadus estatístika KAK, iha tinan ne’e (2021) rejista kazu 70-resin, hosi númeru ne’e maioria  kazu falsifikasaun dokumentu, partisipasaun ekonómia no tipu korrupsaun sira seluk.

“Ami rejista kazu bo’ot hamutuk 70-resin ne’ebé fó prejuizu ba estadu pur volta miliaun ida resin,” nia relata.

Hosi kazu ne’e, nia dehan CAC submete balun ona ba iha Ministériu Públiku no balun to’o ona iha tribunál. Tanba tribunál maka orgaun ida ikus nian atu verifika loos ka la’e investigasaun hosi CAC nian.

 “Daudaun ne’e, ami hasoru dezafiu hanesan rekursu umanu, infraestrutura no teknolójia, maibé la hamate serbisu CAC nian hodi prevene no kombate korrupsaun,” nia garante.

Jornalista : Natalino Costa  

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here