Reprezentante ONU iha Timor-Leste, Saudozu Sergio Vieira de Mello. Imajen/Espesiál.

DILI, 09 dezembru 2021 (TATOLI)—Prezidente Repúblika, Francisco Guterres Lú Olo, aban (10/12) sei atribui Prémiu Direitu Umanu “Sergio Vieira de Mello” ba edisaun-14 ba manán-na’in na’in-haat ne’ebé durante ne’e hatudu ona sira-nia dedikasaun hodi promove, defende no divulga direitu umanu iha Timor-Leste.

Tuir komunikadu imprensa ne’ebé Agencia Tatoli asesu hosi Palásiu Prezidensiál Nicolau Lobato, kinta ne’e haktuir, liuhosi Dekretu Prezidente Repúblika númeru 108/2021, 9 dezembru, Xefe Estadu fó Prémiu Direitu Umanu “Sergio Vieira de Mello” ba manan-na’in ho kategoria Direitu Sosiál, Ekonómiku no Kulturál ba individu, Alexandre Rosa Bruno Sarmento no Paulina da Costa Soares, no ba organizasaun, Orfonatu Dominicana no Casa Vida, Centro de Cuidado às Crianças.

Anualmente, Prezidente Repúblika loke oportunidade ba sidadaun timor-oan no estranjeiru hosi organizasaun governamentál no la’ós governamentál atu hatama sira-nia kandidatura ba Prémiu Direitu Umanu “Sergio Vieira de Mello” tuir kritériu sira-ne’ebé estabelese.

Hafoin Conselho de Agraciamentos e Ordens Honoríficas halo análize, apresiasaun no vizita ba fatin implementasaun atividade hosi kandidatu sira, orgaun konsultiva ne’e sei hato’o ba Prezidente Repúblika atu deside manán-na’in ba Prémiu.

Prémiu Direitu Umanu “Sergio Vieira de Mello” harii ho Dekretu-Lei númeru 15/2009, 18 marsu, atu rekoñese no destaka atividade sidadaun timor-oan no estranjeiru, hosi organizasaun governamentál no la’ós governamentál, ba promosaun, defeza no divulgasaun Direitu Umanu iha Timor-Leste.

Prémiu Direitu Umanu “Sergio Vieira de Mello” fahe ba kategoria Direitu Sosiál, Ekonómiku no Kulturál no kategoria Direitu Sivíl no Polítiku.

Prezidente Repúblika sei atribui Prémiu Direitu Umanu Sergio Vieira de Mello ba manán na’in sira aban, 10 dezembru 2021, no kada manán-na’in sei hetan prémiu ho valór osan $10.000.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here