Nee mak kondisaun komunidade iha area Tasitolu neebe hetan inundasun hafoin udan boot iha, segunda 15/11/2021.Imajen Tatoli/Antonio Goncalves

DILI, 08 dezembru (TATOLI) –  Udan-boot iha kapitál Dili ba loron ohin liu ona oras ida no uma-kain hamutuk 40 hosi inundasaun 4 abríl 2021 liubá, deside hakarak fila ba munisípiu tanba hela-fatin atuál risku ba dezastre naturál.

Tuir observasaun Agência TATOLI ba loron ohin, katak udan hahú hosi tuku 12:07 to’o oras ne’e kontinua nafatin iha área Comoro nian. Ho udan oras ida nia laran ne’e kontinua inunda kapitál Dili. Hosi udan-boot oras ida-ne’e halo edifísiu públiku estadu nian bee nakonu.

Hosi parte suku Comoro, área Kampung Baru, Tasi Tolu, estátua Nicolau Lobato kuaze bee nakonu tanba impaktu hosi udan-boot oras ida-ne’e. Nune’e mós hosi parte Malinamuk, suku Comoro dalan sira nakonu ho bee. Hosi parte estrada iha área Gruta, suku Comoro dalan hanesan mota, nune’e sulin to’o área Tasi Tolu nian.

Iha área Tasi Tolu nian oras ne’e nakonu no estrada loja iha dalan-ninin no komunidade ne’ebé hela besik iha estrada-ninin.

Hosi parte Becora nian oras ne’e udan seidauk para no halo valeta sira intupidu no bee-sulin ba estrada públiku sira.

Vítima inundasaun 4 abríl hakarak fila ba munisípiu

Daudaun ne’e ekipa tékniku hosi Sekretaria Estadu Protesaun Sivíl (SEPS) hahú rejista hodi lori fila família vítima inundasaun 4 abríl ne’ebé hela provizóriu iha sentru akollamentu sira iha Dili.

“Vitima inundasaun 4 abríl nian hamutuk xefe-família ka uma-kain hamutuk 131, iha  xefe família 40-resin mak husu hakarak fila ba sira-nia munisípiu, nune’e ami fó rekuperasaun ba sira no ajuda hodi transporte sira-nia sasán to’o iha fatin,” Diretór Jerál SEPS, Ismael Babo, informa ba Agência Tatoli iha nia kna’ar -fatin, Caicoli, kuarta ne’e.

Daudaun ne’e SEPS halo hela koordenasaun ho autoridade munisípiu sira kona-ba transportasaun vítima ba sira-nia fatin.

“Ami-nia ekipa tékniku halo hela koordenasaun ho atoridade munisipál sira oinsá lori ita-nia maluk sira ba reintegra ba sira-nia munisípiu ho di’ak, tanba foin daudaun ne’e ami konsege reintegra família balun ba fali sira-nia munisipiu,” nia katak.

 “Sira-ne’ebé hili mantein hela iha Dili seidauk iha dadus serteza, tanba ha’u-nia ekipa halo hela rejistu iha terrenu, balun ne’ebé hakarak fila ami identifika katak fatin la merese tanba risku ba dezastre, labele ba hela tán fali, agora ami buka fatin maibé iha Dili rai maka susar liu,” Diretór Jerál SEPS Ismael Babo hateten.

Reprezentante  vítima inundasaun iha akollamentu provizóriu, aldeia Lisbutak, suku Manleuana, munisípiu Dili, Ricardino Matos da Cruz deside hakarak fila ba nia  munisípiu.

“Ha’u hakarak fila ba ha’u-nia munisípiu Aileu, tanba foin daudaun sira parte protesaun sivíl mai haree ba ami-nia uma katak fatin risku labele  halo fali uma iha-ne’ebá,” vítima inundasaun 4 abríl ne’e hateten.

Iha sorin seluk, Lúcina Ataide hateten, nia hili hela nafatin hela iha Dili, maibé  dadaun ne’e rai maka susar ba nia.

Iha parte seluk, udan boot ne’ebé akontese ohin dadaeersan, hahú hosi tuku 05:00 dadersan to’o tuku 07:00 dadeersan, Protesaun Sivíl iha munisípiu Viqueque la identifika afeita ba komunidade sira-nia uma no sasán.

“Udan boot ne’ebé akontese iha munisípiu Viqueque, ami seidauk simu informasaun ruma dehan afeta ba komunidade ka estraga komunidade sira-nia uma no sasán ruma,” Koodenadór Protesaun Sivíl Munisípiu Viqueque, Cirilo Soares Gomes, informa ba Agência Tatoli, iha Viqueque Vila, kuarta ne’e.

Jornalista: Natalino Costa/Vitorino Lopes da Costa

Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here