Ámbitu debate no votasaun Proposta Lei OJE 2022 iha faze espesialidade, iha sala plenária PN, segunda (06/12). Imajen TATOLI/Egas Cristóvão.

DILI, 07 novembru 2021 (TATOLI)—Parlamentu Nasionál aprova proposta Orsamentu Jerál Estadu (OJE) 2022 ho montante millaun $40 ba Sekretrária Estadu Kooperativa (SECoop, sigla portugés) hodi implementa programa Cesta Bázika.

“Cesta Bázika uluk povu dehan osan to’o ami finál bele prodús no orsamentu ne’ebé ba to’o duni povu. Tan ne’e orsamentu ne’e atu nesesidade ba ai-han presiza no apoiu mós oinsá produsaun bele la’o hosi produtór prodús aproveita oinsá kooperativa produsaun bele la’o,” Deputadu proponente, Antoninho Bianco, hateten iha plenáriu PN, tersa ne’e.

Proposta ne’e la’ós atu sobu programa Governu maibé atu kontinuasaun programa Governu ne’ebé uluk tau rezultadu fó efeitu boot ba povu.

Reprezentante povu iha uma fukun tersa ne’e, halo diskusaun ba proposta OJE 2022 faze espesialidade loron daruak, aprova proposta númeru 17 aumenta ho montante millaun $40 ba SECoop hodi implementa programa Cesta Bázika iha tinan-oin.

Títulu SECoop kategória despeza, transferénsia públika, programa ho kódiku 028 kona-ba dezenvolvimentu rurál no urbanu ho montante $1.500.000 alterasaun aumenta tan $40.000.000 nune’e programa refere sa’e ba $41.500.000.

Justifikasaun sumária hosi proponente sira katak, orsamentu reforsa programa Cesta Bázika medida planu rekuperasaun ekonómika ho objetivu fornese alimentu no produtu ba populasaun nasionál.

Objetivu prinsipál medida ne’e apoia família atendimentu nesesidade báziku kontribui redús hamlaha no vunerabilidade iha rejiaun ne’ebé izoladu ne’ebé hasoru situasaun pobreza iha nasaun hanesan apoiu produtór, agrikultór no komersiante lokál ho forma estimula dinaniza ekonómika lokál ho meiu sirkulasaun rekursu finanseiru nesesáriu momentu produsaun nasionál no redús impaktu krize ekonómia.

Nune’e sei tau iha programa 588 promosaun no estabelesimentu kooperativa ho nia sub-programa promove estabelese kooperativa no atividade apoia kooperativa produsaun integradu no dirasaun nasionál dezenvolvimentu kooperativa produsaun dotasaun inisiál atividade rihun $800 alterasaun millaun $40.

Proposta númeru 17 hosi proponente Antoninho Bianco, Francisco de Vasconcelos, Olinda Guterres, Maria Angelica Rangél.

Proposta ne’e pasa ho votu a-favór- 35 kontra 25 no abstensaun tolu, nune’e pasa.

Aleinde ne’e Parlamentu Nasionál aprova mós proposta OJE 2022 ba SECoop nian ho rezultadu votasaun a-favór-35, kontra 18 no abstesaun 10.

“Nune’e orsamentu ba SECoop  ho alterasaun  introdús proposta númeru 17 hotu pasa,’’ Prezidente Parlamentu Nasionál, Aniceto Longuinhos Guterres, anunsiu liuhosi plenária

Ministru Finsansa, Rui Augosto Gomes, hateten prospota ne’e prevee aumenta $40.000.000 sei tau iha SECoop atu finansia programa Cesta Bázika.

Programa Cesta Bázika ramata tiha ona no Governu laiha planu atu renova programa ida-ne’e tanba nia ezekusaun kria mós dekretu-lei ida atu hamosu programa refere.

“Iha tempu liu-ba programa Cesta Bázika hetan krítika oioin, karik ho sentidu la renova fila-fali maibé hosi perspetiva ekonómia ita bele dehan proposta ida-ne’e di’ak no deputadu sira bele tetu aprova dotasaun ne’e,” nia dehan.

Governante ne’e akresenta, nia ezekusaun la hanesan ho Cesta Bázika tanba hamosu problema barak iha pasadu. Tanba ne’e, sujestasaun iha diskusaun ida-ne’e bele halo programa refere liuhosi parseria ho UNDP, WFP ajénsia Nasaun Unida nian hodi sira mós envolve iha laran  diresiona programa refere liután, nune’e ba duni populasaun kbiit laek ne’ebé hamlaha.

“Tanba se bele la’ós Governu mak interven maibé ho parseria Nasaun Unida nian ida-ne’e mós  evita aumentu iha perdian hanesan iha pasadu mosu krítika. Purtantu atu dehan ita bele kria subsídiu alimentasaun hahú hosi, pur exemplu, kria kantina ho alimentasaun ne’ebé subsidiada iha universidade, institutu públiku  nune’e funsionáriu meudia la presiza ba to’o uma atu han maibé bele han iha servisu fatin rasik ho presu kiik,” nia hateten.

Nune’e bele estimula mós empreza sira-ne’ebé fornese ai-hán no produtór lokál, ida-ne’e maneira ida halo ho presu baratu.

“Ami-nia sujestasaun se bele karik Parlamentu Nasionál aprova dotasaun ne’e maibé Governu mak sei ezekuta no ita konsiente ho aprovasaun dotasaun ne’e, ita-nia tetu orsamentál sei sa’e, nia hateten.

Nune’e Governu sujere, karik timor-an labele sobu programa sira-ne’ebé planeadu tiha ona.

Tanba, nia dehan, haree proposta ne’ebé tama barak liu mak sobu programa sira-ne’e, se bele karik tranzita tiha ba faze iha orsamentu hakarak ka lakoi, konserteza mezmu Parlamentu Nasionál aprova dotasaun boot maibé depende nia ezekusaun iha.

Primeiru Ministru, Taur Matan Ruak, reforsa tan maneira proposta sira tama hanesan Ministru Finansa fó sai tetu sei sai.

“Ha’u-nia opiniaun hanesan Ministru Finansa dehan, ita labele sobu fali ida-ne’ebé iha ona. Se ita deside aumenta tetu, aumenta de’it tetu duké ita sobu fali iha laran,” PM Taur hateten.

Sekretária Estadu Koperativa, exersisíu kompeténsia, responsavél ba promosaun no fortalesimentu ba setór ekonomia sosiál, mediante aprofunda kooperasaun entre Estadu no organizasaun integra setór koperativu, ho objetivu estimula potensiál servisu dezenvolvimentu sosiu ekonómiku iha país (Artigo 2º do Decreto-Lei 22/2019, de 31 de julho).

OJE 2022, SECoop prevee $4,605,547 ne’ebé aloka ba saláriu vensimentu $684,394,  bens servisu $2,371,153, kapitál menór $50,000,  kapitál dezenvolvimentu laiha, transferénsia públika $1,500,000, no orsamentu ne’e hodi finansia programa rua (2), sub-programa tolu  (3) no atividade  14.

Programa dezenvolvimentu rurál no urbanu sei gasta $2,514,024 no pograma boa-governasaun no jestaun instituisionál sei gasta $2,091,523.

Programa ho kódiku 028, dezenvolvimentu rurál no urbanu ho objetivu médiu prazu aumenta númeru empregu liuhosi estabelesimentu koperativa.

Ho sub-programa promove no estabelese koperativa ho ninia atividade mak dezenvolve kapasidade rekursu umanu koperativa, apoiu koperativa produsaun integradu, promove dezenvolvimentu estratéjiku kooperativa, apoiu estabelesimentu sentru dezenvolvimentu koperativa, porporsional asesu finansiamentu no seguru risku hosi koperativa, reforsa no konsolida juventude iha área koperativa.

Programa ho kódiku 510 boa-governasaun no jestaun instituisionál ho objetivu médiu prazu konstrui konfiansa Governu, ho ninia sub-programa rua no atividade ualu (8).

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here