Komandu Falintil-Forsa Defeza Timor-Leste (F-FDTL), Korpu Fujileiru Navál halo simulasaun hosi tasi laran la'o sai mai rai-maran iha Tasi Ibun Beacou, tersa (07/12). Imajen Tatoli/Francisco Sony.

BOBONARO, 07 dezembru 2021 (TATOLI)—Komandu FALINTIL-Forsa Defeza Timor-Leste (F-FDTL) hosi Korpu Fujileiru Navál tersa ne’e, halo ezersísiu simulasaun komandu hosi tasi-laran (dezembarka) mai rai-maran iha tasi ibun Beacou, postu administrativu Atabae, munisípiu Bobonaro.

Notísia Relevante: Ezersísiu Cobra iha Bobonaro orienta forsa familiariza terrenu

Komandante Postu Tátiku Ezersisiu Cobra 21-2 atuál komandante Aero F-FDTL, Tenente Koronel Helder da Costa. Imajen Tatoli/Francisco Sony.

Komandante Postu Tátiku Ezersísiu Cobra 21-2, Atuál Komandante Aero F-FDTL, Tenente Koronel Helder da Costa hateten, korpu Fujileiru Navál ne’ebé ohin hala’o ezersísiu hosi tasi mai rai-maran ka dezembarka ne’e ezersísiu ida ba korpu Fujileiru Navál ne’ebé hala’o iha tasi ibun Beacou no Komponente Tereste nian mós hosi Maliana Ritabou hala’o ezersísiu marsa iha área terrestre nian.

Komponente rua ne’e sei halo pontu junsaun ka hamutuk iha área aldeia Damlaran, suku Aidaba-Leten, postu administrativu Atabae. Munisípiu Bobonaro.

“Ita-nia forsa hosi korpu Fujileiru Navál halo ezersísiu hosi tasi sai mai rai maran ne’e atu kumpri misaun okupa tasi ibun ba pontu junsaun ka hamutuk ho Komponente Tereste hodi halo atake ba área inimigu nian. Tanba ita ko’alia iha situasaun real, ida-ne’e hanesan operasaun konzuntu hosi Komponente Tereste no Komponente Navál liuliu sira Fujileiru hamutuk atu mai destroi inimigu nia pozisaun,” Komandante Tenente Koronel Helder da Costa hateten ba jornalista sira iha Postu Komandu Prinsipál Tunubibi.

Komandu Falintil-Forsa Defeza Timor-Leste (F-FDTL), Korpu Fujileiru Navál halo simulasaun hosi tasi laran la’o sai mai rai-maran iha Tasi Ibun Beacou, tersa (07/12). Imajen Tatoli/Francisco Sony.

Segundu Tenente Fujileiru Navál, Basilio dos Santos Soares, hateten Korpu Fujileiru Navál nia misaun mak hala’o asaun hosi meiu náviu nian ne’ebé sei transporta via marítima hosi tasi laran mai rai-maran, ba iha pontu ne’ebé distina ona no sira sei marka pontu hodi desloka sira ba tasi hodi halo dezembarka mai rai-maran.

“Iha meus rua ne’e mak ami sei uza ró ne’ebé uza hosi Fujileru sira halo asaun nomós ida fali Fujileiru sira hala’o asaun nani mai rai maran. Entaun, ohin ne’e ami halo misaun nani hosi tasi pontu markasaun mai iha tasi ibun dezembarka,” nia dehan.

Iha ezersísiu simulasaun komandu Fujileiru Navál ne’e, ohin markasaun ba fatin pontuasaun ne’ebé fó sinál utilizasaun bandeira bainhira iha tempu loron nian no iha tempu kalan sira sei utiliza sinál lampu lakan atu fó sinál ba sira-ne’ebé mak halo asaun.

“Seguransa na’in-rua mai uluk hanesan seguransa no ami-mai okupa iha praia dezembarka bainhira ami uza ró kiik, mak ami sei utiliza naran depozitu praia atu halo kamplazen ba ró kiik  sira hafoin ami ba halo misaun. Tanba ezersísiu ida-ne’e hanesan parte ida hosi atividade ezersísiu Cobra 21-2 ne’ebé halo ona abertura horisehik,” nia hateten.

Jornalista : Francisco Sony

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here