Diretór Obra Públika Munisípiu Baucau, Pedro Alexandre Guterres Pereira. Imajen Tatoli/Natalino Belo.

BAUCAU, 06 dezembru 2021 (TATOLI) – Kompañia neen (6) sei hahú halo reabilitasaun Estrada Rurál ba Dezenvolvimentu (ERD) hosi totál pakote neen iha postu administrativu Quelicai no Venilale, munisípiu Baucau.

Diretór Obra Públika Munisípiu Baucau, Pedro Alexandre Guterres Pereira, haktuir iha loron 29 novembru fó-sai ona rezultadu konkursu.

Rezultadu konkursu ne’e kona-ba reabilitasaun ERD ho pakote neen iha postu administrativu Quelicai, suku Afasa-Uaitame ho kilómetru sia (9) no postu administrative Venilale Vila ba suku Uaioli hamutuk pakote tolu (3) ho kilómetru 8.5 hosi totál kilómetru 20.5 ho totál orsamentu millaun $3.

Kompañia neen (6) ne’e mak hanesan: Flores Unipessoal Lda, Helsia Unipesoal Lda, Dilidi Unipessoal Lda, Putra Baucau Unipessoal Lda, Macalaco Unipessoal Lda no Morenda Unipessoal Lda.

Kompañia manán-na’in iha Afasa-Uaitame mak komposta hosi Flores Unipessoal Lda ho distánsia kilómteru tolu (3). Nune’e mós pakote dahuluk kilómetru tolu (3) to’o neen (6) hosi kompañia Helsia Unipesoal Lda no pakote datoluk kilómetru neen (6) to’o kilómteru sia (9) hosi kompañia Dilidi Unipessoal Lda.

“Afasa tuir loloos pakote haat maibé ida ikus ne’e kilómetru sia (9) to’o kilómetru 12, posibilidade kompañia ne’ebé kompete la pasa kritériu entaun re-konkursu fali, novembru mak foin site visit lori ba prosesu fali iha aprovizionamentu,” Diretór MOP Baucau ko’alia Vila Nova, segunda ne’e.

Iha postu administrativu Venilale hamutuk pakote tolu diresaun Venilale ba Uaioli totál kilómtetru 8.5 fahe ba pakote tolu komposta pakote dahuluk zero kilómteru to’o kilómteru tolu (3) no kompañia Putra Baucau Unipessoal Lda mak manán.

Purtantu pakote daruak kilómteru tolu (3) to’o kilómteru neen (6) ezekuta hosi kompañia Macalaco Unipessoal Lda no kilómetru neen (6) to’o kilómetru 8.5 responsabiliza hosi Kompañia Morenda Unipessoal Lda.

“Hosi Venilale ba Uaioli ne’ebé mak kondisaun estrada aat tebes, Baucau tinan ne’e pakote neen (6), tuir loloos hitu (7) maibé ida mak la prenxe kritériu entaun re-konkursu fali,” Pedro akresenta.

Prosesu refere foin anunsia hosi Komisaun Nasionál Aprovizionamentu (CNA, sigla Portugés) sei fó tempu loron 15 atu kompañia ne’ebé la sai vensedór hato’o reklamasaun. Bainhira laiha reklamasaun MOP sei bolu atu asina kontratu no mobiliza ekipamentu iha fatin konstrusaun hodi hahú serbisu.

Nia fó-sai katak, projetu ne’e ho durasaun loron 356 bazea ba kalendáriu serbisu nian.

“Ita redús ona estrada ho kilómetru 169 hosi totál kilómteru 474 korresponde 36%, ita presiza tán orsamentu atu finaliza,” Pedro argumenta.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here