Karketu Dili FC halakon nia adversáriu DIT FC ho rezultadu mihis 1-0. imajen mídia LFTL.

DILI, 04 dezembru 2021 (TATOLI) – Ekipa rai na’in kapitál Dili, Karketu Dili FC susesu iha jornada dahaat Liga Futeból Timor–Leste (LFTL) hodi halakon nia adversáriu DIT FC ho rezultadu mihis 1-0 iha Estádiu Munisipál Dili, sabadu lokraik ne’e.

Hosi vitória ne’ebé Karketu hetan lori ekipa ne’e kandidatu ba kampiaun iha LFTL époka ne’e tanba daudau ne’e Karketu iha ona pontu 10 okupa pozisaun dahuluk, AS Ponta Leste ho pontu neen okupa pozisaun daruak.

Nune’e mós Lalenok United FC okupa pozisaun datoluk ho pontu neen, AD SLB Laulara ho pontu haat okupa pozisaun dahaat, Assalam FC ho pontu tolu okupa pozisaun dalimak, Aitana okupa pozisaun daneen no DIT nafatin tuur iha zona mean ho pontu zero alias degradasaun.

Hosi derrota ne’e mós fó ameasa ba DIT tanba hela de’it jornada tolu, tanba ne’e iha jogu tolu ikus ne’e DIT tenke serbisu maka’as atu haksoit sai hosi zona degradasaun. Karketu mós hela de’it ona jornada tolu bainhira manán hotu hakat ona ba kampiaun.

Maski nune’e sei iha ekipa seluk ne’ebé duni tuir hela hosi kotuk hanesan Ponta Leste no Lalenok ne’ebé pontu la dook hosi Karketu no jogu ba ekipa hirak ne’e sei hela tolu.

Jogu ba ekipa rua ne’e hala’o ladún iha emosaun ne’ebé maka’as maibé DIT hatudu jogu ho esforsa-an maka’as atu buka golu nune’e bele manán hodi ultrapasa ba tuur iha jona ne’ebé dalan ba kampiaun.

Esforsu hotu ekipa rua halo hela de’it hanesan esforsu durante menutu 45 nia laran tanba laiha ekipa ida mak prodús golu nune’e bele fó vitoria ba sira-nia ekipa.

DIT Jogu ho esforsu an maka’as hakarak halo empata no manán nune’e bele haksoit sai hosi zona mean maibé la konsege tanba armada Karketu la fó fatin nune’e to’o me4nutu termina ekipa rua tenke hela ho rezultadu 0-0.

Tama ba segunda parte, ekipa rua nafatin lansa kontra no atake ho ambisaun ne’ebé makas liu hosi pasa bola hosi ain ba ain, maibé forsa ba ekipa rua kuaze hanesan nune’e seidauk rezulta golu.

Maibé iha menutu 69 defeza DIT nian halo defensivu ba bola sutu ne’ebé Karketu lansa bola halai ba kantu nune’e fó oportunidade ba Karketu lansa sutu iha lina perigozu ne’e.

Sutu ne’e ezekuta hosi jogadór Nataniel Reis (8) fó duni rezultadu di’ak ba Karketu tanba bola barullu iha lina DIT nia oin halo defeza no guarda rede Ricardo Nunes (98) monu ba sorin jogadór Karketu Gaudencio Monteiro (14) lansa kedan golu muda rezultadu ba 1-0.

Golu ne’e halo DIT nia prestasaun jogu tún kedas no Karketu domina bola to’o jogu remata, iha oportunidade balun ba avansadu DIT José Santos (7) maibé la konsege ezekuta ho di’ak nune’e la rezulta golu ba Karketu no rezultadu tuur-metin ba 1-0 too jogu termina, vitoria ba Karketu.

Jornalista         : Hortencio Sanchez

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here