Prezidente Repúblika, Francisco Guterres ‘Lú Olo’. Imajen Tatoli/Jogerjo Guuterres.

DILI, 03 dezembru 2021 (TATOLI)—Prezidente Repúblika, Francisco Guterres Lú Olo hateten katak kooperasaun bilaterál entre Repúblika Populár Xina no Timor-Leste sei kontinua nafatin no metin liután.

Prezidente Repúblika hato’o agradesimentu ba Governu Repúblika Populár Xina tanba fó apoiu makaas hafoin akontese inundasaun iha 04 abríl no apoiu atu kombate COVID-19 hodi oferese vasina Sinovac ba povu Timor-Leste.

“Nu’udar Prezidente Repúblika, ha’u hakarak hato’o agradesimentu boot ba apoiu sira-ne’ebé Repúblika Populár Xina halo ona ba povu Timor-Leste, iha momentu akontese inundasaun no pandemia COVID-19. Povu Timor-Leste konsege halo vasina tanba apoiu mai hosi nasaun lubuk ida inklui Xina, no sei buka dalan oioin atu hametin liután kooperasaun,” Prezidente Repúblika hateten liuhosi komunikadu imprensa ne’ebé Agência tatoli asesu hosi Palásiu Prezidensiál Nicolau Lobato, Bairru Pite, Dili, sesta ne’e. 

Prezidente Repúblika agradese ba apoiu sira-ne’ebé Governu Repúblika Populár Xina halo ona mai Timor-Leste, liu-liu iha tempu defísil hanesan krize saúde públika ne’ebé akontese tanba pandemia COVID-19 no inundasaun ne’ebé akontese iha tinan kotuk.

Embaixadór Repúblika Populár Xina ba Timor-Leste, Xiao Jianguo, transmite Prezidente Repúblika Xi Jinping nia fesilitasaun ba Prezidente Repúblika Francisco Guterres Lú-Olo.

Iha audiénsia ne’e, Embaixadór relata kooperasaun ne’ebé hala’o iha Timor-Leste, iha área edukasaun, saúde, agrikultura ne’ebé estabelese tiha ona.

Ba oin Xina sei tau prioridade sira-ne’ebé konsentra ba grupu vulneravel sira no kontinua apoiu setór seguransa no defeza, agrikultura, saúde no infraestrutura.

Ba prevensaun no kontrolu COVID-19, Governu Xina fó apoiu 100 mil vasina Sinovac no ekipamentu saúde iha luta hasoru pandemia.

Xina manifesta nia prontidaun atu haree posibilidade ba oin ho vasina ba terseira doze.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here