BOBONARO, 03 dezembru 2021 (TATOLI) – Diresaun Servisu Protesaun Sivíl Jestaun Deszastre Munisípiu Bobonaro, preparadu proteje komunidade hosi risku dezastre naturál no kalaminda públika ne’ebé akontese iha munisípiu refere.

Diretór Protesaun Sivíl Jestaun Dezastre Munisípiu Bobonaro, António Soares, informa, daudaun ne’e nesesidade emerjénsia komposta hosi food item ho non food item no fasilidade preparasaun no manutesaun preparadu hela iha armazein, Soso, Maliana.

“Agora ita hein de’it dadus tama mai, ita sei distribui kedas, sé dezastre akontese iha fulan ida nia laran ita bele atende hela, tanba ita prepara hela fós sufisiente bele apoia ba uma-kain 200 hanesan ne’e inklui mós nesesidade bázika non food item,” nia informa ba Agência Tatoli, iha salaun administrasaun munisipál, Bobonaro, sesta ne’e.

Diresaun Munisipál Servisu Protesaun Sivíl mós halo koordenasaun serbisu ho Sekretaria Estadu Protesaun Sivíl no Bombeiru nune’e bainhira akontese dezastre hanesan rai-halai no bee sa’e, tenke evakua no proteje komunidade sira hosi risku.

Nune’e mós monta hotu ona alarma iha tasi-ibun área postu administrativu Atabae to’o iha área Batugade  atu fó atensaun ba komunidade banhira akontese Tsunami.

“Alarma sira-ne’e tinan kotuk sira halo tiha ona simulasaun, depois iha-ne’ebá pista ne’ebé sira hakerek karik bee-sae atu halai fatin ne’e sira hatene tiha ona, ne’ebe ekipamentu sira-ne’e sei funsiona hotu ho diak,” nia katak.

Maske seidauk identifika fatin risku ba dezastre naturál, maibe diretór ne’e nafatin apela ba komunidade munisípiu Bobonaro ne’ebé hela iha foho-lolon no mota-ibun, bainhira akontese udan-boot evakua lalais ba iha sede suku no sede aldeia ne’ebé besik nune’e bele proteje-aan hosi dezastre.

Nia dehan, atu evita komunidade sira hosi risku dezastre prevee orsamentu rihun $25 atu rezolve situasaun perigu ne’ebé komunidade sira enfrenta.

“Ita mós planu iha janeiru, ami sei halo sensibilizasaun ba komunidade sira-ne’ebé hela besik iha foho- lolon, atubele konsensializa sira bainhira udan-boot, tenke halai lalais ba fatin seguru,” nia hatutan.

Diretór Protesaun Sivíl Jestaun Dezastre Munisípiu Bobonaro enkoraja komunidade sira atu labele tesi-ai no sunu ra- arbiru iha foho lolon nune’e bele evita dezastre naturál hanesan rai-halai no erozaun.

Notísia relevante: PN Aprova Ona Proposta-Lei Protesaun Sívil

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here