Assesora Saude ba Primeiru ministru, Dra. danina coelho hamutuk komisaun interministerial hala’o konferensia imprensa kona-ba proresu implementasaun Vasinasaun Kontra Covid-19 iha Timor-Leste. iha salaun MSSI Caicoli, kinta (02/12) Imajen TATOLI/Egas Cristóvão

DILI, 02 dezembru 2021 (TATOLI)—Tuir dadus ne’ebé fó sai hosi Ministériu Saúde, populasaun idade 18 ba leten ne’ebé simu ona vasina kompletu hamutuk 456,567, ekivalente ho 60,5%.

“Kobertura ba vasina COVID-19 ba populasaun idade 18 ba leten ne’ebé hahú simu vasina doze dahuluk iha territóriu laran hamutuk 614,295 (81,4%) no doze daruak ka kompleta ema 456,567 (60,5%). Nune’e totál populasaun ne’ebé simu vasina AstraZeneca no Sinovac hamutuk 1,070,862,” Portavóz Komisaun Interministeriál ba Implementasaun Vasina COVID-19 iha Timor-Leste, Danina Coelho, ba jornalista sira iha MSSI, Caicoli, kinta ne’e.

Hosi totál 1,070, 862 ne’e, kompostu populasaun idade 18 ba leten ne’ebé simu ona vasina AstraZeneca doze dahuluk 75.1% ho ema 567,107 no doze daruak 54,6% ho ema ne’ebé simu 412,130 ho totál ema simu vasina 979,237. Enkuantu, populasaun ne’ebé simu ona vasina Sinovac hamutuk 91,625, kompostu doze dahuluk ema hamutuk 47,188 (6,3%) no doze kompletu 44,437 (5,9%).

Dadus Progresu imunizasaun COVID-19 iha Timor-Leste. imajen/MS

Alende ne’e, totál populasaun idade 18 mai kraik, ne’ebé simu ona vasina Pfizer hamutuk 50,218, kompostu hosi doze dahuluk hamutuk ema 34,031 ho 18,7%. Enkuantu vasina doze daruak 8,9% ne’ebé ekivalente ho ema 16,187.

Nune’e, totál vasina  ne’ebé fó ona, to’o  mai 02 dezembru ne’e hamutuk 1,121, 080, kompostu hosi vasina AstraZeneca 979,237, Sinovac 91,625 no Prizer 50,218.  

Governu kontinua apela ba populasaun sira ne’ebé elijível ho idade 18 ba leten atu hakbesik an sentru saúde hodi simu vasina atubele redús impaktu hosi COVID-19.

“Importante teb-tebes atu iha kobertura vasina ba ema barak hodi proteje an hosi COVID-19 no bele selebra loron feriadu sira ho família ho seguru,” nia fó hanoin.

Komisaun ne’e mós husu ba sidadaun atu kontinua prátika medida prevensaun sira hanesan fase liman bebeik, uza maskára, mantein distánsia fízika hosi ema seluk iha fatin publiku no evita atu hakat fronteira ilegalmente atubele hapara kontajia virus ba ema seluk.

Nune’e mós husu populasaun munisípiu Ermera, Bobonaro no liquiça ne’ebé iha kobertura vasinasaun menus liu atubele partisipa másimu hodi simu vasina iha sentru saúde.

Entretantu, Governu Timor-Leste simu ona vasina husi doadór sira hanesan Covax facility, Nova Zelandia, Austrália, Xina, Portugál, Japaun no Estadu Unidu Amérika hamutuk 1.313.270. Timor-Leste rejista ona kazu COVID-19 hamutuk 19,823 no óbitu 122.

Notísia Relevante: Vasina Pfizer doze dahuluk atinje ona 18,7%

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here