Primeiru-Ministru, Taur Matan Ruak, hamutuk ho membru Governu sira Partisipa iha debate Jeneralidade ba Proposta Lei OJE tinan 2022, iha sala plenária PN, kuarta (01/12). Imajen TATOLI/Egas Cristóvão

DILI, 01 dezembru 2021 (TATOLI)—VIII Governu Konstitusionál hahú ona polítika polítika fiskál atu aumenta reseita doméstika nu’udar ferramenta importante ba polítika ekonómika no sosiál, liuhosi hasa’e presu ba bebida alkólika no tabaku, iha tinan oin.

“Ami avansa ho introdusaun impostu hanesan ‘inibidór’ konsumu, ne’ebé la’ós de’it atu aumenta reseita doméstika, maibé sei benefisia ba povu nia saúde, liuliu jerasaun foin-sa’e,” Primeiru-Ministru, Taur Matan Ruak, hateten, iha ámbitu debate Orsamentu Jerál Estadu (OJE) 2022, loron dahuluk iha faze jeneralidade, iha sala plenáriu Parlamentu Nasionál (PN), kuarta ne’e.

Tuir Xefe Governu, aumentu ne’e ho objetivu atu kontribui hasa’e arrekadasaun reseita doméstika no hamenus konsumu bebida ho kontíudu álkool a’as, ne’ebé iha efeitu bele estraga konsumidór nia saúde, tanba aumenta diferensa entre taxa impostu ba serveja no álkool menus hosi 4,5% no bebida ho volume alkóliku boot liu.

“Ita hakarak kontinua promove indústria nasionál ba produsaun bebida, ne’ebé kria empregu barak, tantu diretu no indiretu hodi evita merkadu doméstiku nakonu ho importasaun ho folin kiik, ne’ebé la kontribui ba ekonomia nasionál.

Nune’e, taxa impostu seletivu konsumu aplikável ba serveja malte ne’ebé ho volume álkool kiik hosi 4,5%, sa’e hosi $2,50 ba $2,70 kada litru, no taxa impostu seletivu konsumu nian aplikável ba serveja malte ne’ebé ho volume álkool sira seluk, hanesan tua, vermute no bebida sira seluk ne’ebé fermenta ona, sa’e hosi $3,50 ba $4,50 kada litru.

Iha sorin seluk, Xefi Ezekutivu nota mós katak organizasaun internasionál sira hatudu Timor-Leste hanesan país ne’ebé ho prevalénsia fumadór boot liu, liuliu ba joven sira, durante tinan-10 ikus ne’e país barak iha ona susesu uza agravamentu fiskál hodi hamenus konsumu tabaku.

Nune’e, ho objetivu atu prevene konsumu tabaku, produtu ne’ebé ho ninia prejuizu boot ba saúde, prevee katak aumentu taxa impostu seletivu ba konsumu aplikável ba tabaku, daudaun ne’e $19 kada kilograma sa’e ba $25 kada kilograma, hanesan aumentu ne’ebé PN sujere ona ba Governu iha tinan kotuk.

Aumentu sira-ne’e sei tau iha konsiderasaun iha reforma lejizlasaun fiskál, ne’ebé daudaun ne’e la’o hela, Governu tenke utiliza taxa impostu hodi promove adosaun ba populasaun nia komportamentu saudável.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here