Osan Dolar Amérika. Imajen/Espesiál

DILI, 01 dezembru 2021 (TATOLI)—Proposta Orsamentu Jerál Estadu (OJE) 2022 ba despeza públika akumula hosi reseita doméstika.

 “Levantamentu Fundu Petrolíferu sei finansia 62,2% ba despeza públika, ne’ebé finansiamentu ba despeza Estadu sei asegura ho parsiál hosi reseita doméstika sira ne’ebé tau-hamutuk ona ho valór millaun $150,” Primeiru-Ministru (PM), Taur Matan Ruak, hateten iha ámbitu debate faze jeneralidade, iha sala plenária Parlamentu Nasionál (PN), kuarta ne’e.

Integrasaun saldo kaixa tezouru no Rejiaun Administrativa Espesiál Oé-cusse Ambeno (RAEOA) no ZEESM kontabiliza millaun $415 hodi selu empréstimu to’o limite millaun $50, ba doasaun, eransa no legadu  kalkula ona ba millaun $15 no ho apoiu diretu rua ba orsamentu ne’ebé asume hosi Uniaun Europeia millaun $  no Governu australianu ho valór millaun $6,6.

“Fundu petrolíferu hanesan bensaun ida mai país, maibé oras ne’e atu aborda ho seriedade, ho meiu seluk hodi hetan reseita, atu garante katak ita iha rekursu  atu finansia implementasaun objetivu nasionál sira,” nia akresenta.

PM rekoñse, Governu tenke hasa’e investimentu loloos no hamenus despeza esensiál, hodi limita despeza ho funsionamentu administrasaun públika, saláriu, viatura, viajen, catering no kapitál menór sira.

“Maski ho redusaun 17% iha orsamentu, défise públiku sei kontinua atu finansia liuhosi levantamentu anuál Fundu Petrolíferu ne’ebé a’as liu fali Rendimentu Rendimentu Sustentável Estimadu (RSE),” nia tenik.

Husi tinan 2009 to’o ohin loron, kada tinan foti osan hosi fundu ne’e, reprezenta maizumenus 5% hosi rikeza petrolífera no iha sorin seluk, RSE prevee ho 3%, ne’ebé RSE ba tinan fiskál oinmai kalkula ona ho valór millaun $554.

Totál rikeza petrolífera Fundu Petrolíferu iha loron 01 janeiru 2021 atinje ona valór biliaun $18,289 no prevee katak iha janeiru 2022 sei atinje valór totál biliaun $18,469.

Iha proposta orsamentál tinan 2022 ne’ebé aprezenta ba PN, Governu propoin hasai biliaun $1,042 Fundu Petrolíferu, ne’ebé valór ne’e ultrapasa RSE ho totál millaun $488.

Empréstimu ne’ebé Governu foti liuhosi instituisaun finanseira internasionál sira hanesan Banku Mundiál no Banku Dezenvolvimentu Aziátiku, utiliza beibeik ona hodi finansia projetu-xave investimentu iha infraestrutura no kontinua sai solusaun ba finansiamentu alternativa sustentável iha Fundu Petrolífera, hodi fó taxa jurus ne’ebé di’ak ba Estadu no períodu karénsia ne’ebé boot.

To’o tinan 2021 nia rohan, dívida públika ne’ebé akumula ona reprezenta 18,9% hosi Produtu Internu Brutu (PIB) nasionál, ne’ebé finansiamentu atu garante selu fali empréstimu esternu konsesionál sira iha tinan 2022, sei iha valór millaun $50,8, ho limite másimu ne’ebé propoin millaun $410 ba subskrisaun empréstimu esternu foun.

“Objetivu polítika ida-ne’e mak atu estimula diversifikasaun no kreximentu atividade ekonómika fundamentál ba país ne’e, nune’e atu kontribui ba kreximentu ekonómiku inkluzivu no atu hamenus kiak,” PM subliña.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here