Xefe Estadu-Maiór Forsa Armada (XEMFA), Brigadeiru Jenerál Calisto dos Santos Coli ‘Coliati’ . Imajen TATOLI/Egas Cristóvão

DILI, 01 dezembru 2021 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu deliberasaun ba ezonerasaun no nomeasaun Xefe Estadu-Maiór Forsa Armada (XEMFA), Brigadeiru Jenerál Calisto dos Santos Coli ‘Coliati’ inklui Komandante Komponente FALINTIL-Forsa Defeza Timor-Leste (F-FDTL) sira.

Projetu deliberasaun ne’e aprezenta hosi Primeiru-Ministru (PM) no Ministru Interiór (MI), Taur Matan Ruak, hamutuk ho Ministru Defeza (MD), Filomeno da Paixão de Jesus.

“Mudansa kargu iha Forsa Armada akontese beibeik, nune’e hanesan medida ida atu kontribui, nune’e Forsa Armada bele sai profisionál tanba presiza iha koñesimentu ba área hotu, tanba ne’e di’ak liu iha mudansa, hafoin asume kargu ruma tinan barak, muda fali ba kargu seluk, entaun ne’e hola parte hosi vida no karreira militár,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: Koronél Coliati Konsidera Kargu Xefe Estadu Maior Todan

Nune’e, proposta ezonerasaun no nomeasaun ne’e sei submete ba Prezidente Repúblika hodi deside, nu’udar Komandante Supremu.

Ba kestaun ne’e, governante ne’e prefere atu la fó sai naran sira ne’ebé atu troka tanba Governu propoin ona ba Xefe Estadu, nune’e sei hein desizaun ikus.

Prezidente Repúblika nomeia Coliati nu’udar Xefe Estadu-Maiór F-FDTL, liuhosi dekretu Prezidente Repúblika númeru 45/2018, loron 23 outubru.

Brigadeiru Jenerál Coliati antes ne’e asumi kargu nu’udar Adidu Defeza Timor-Leste ba Austrália, hahú hosi fulan-juñu 2014 to’o jullu 2018.

Coliati moris iha loron 10 agustu 1959, iha suku Darulete, postu administrativu Liquiçá, munisípiu Liquiçá.

Bazeia ba lei númeru 11/2021 23 juñu, ne’ebé prosede ba alterasaun dahuluk ba lei  númeru 3/2010, 21 abríl kona-ba Lei Defeza Nasionál, iha artigu 17 aliña D, Xefe Estadu-Maiór Forsa Armada nu’udar jenerál nomeadu no ezoneradu hosi Prezidente Repúblika, hosi sob proposta Governu, ne’ebé antes ne akontese ona audisaun Konsellu Superiór Defeza Militár no Konsellu Superiór Defeza no Seguransa, liuhosi membru Governu tutela iha área Defeza.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here