TradeInvest Timor-Leste. Imajen/Espesiál

DILI, 01 dezembru 2021 (TATOLI)– Ajénsia Promosaun Investimentu ka The World Association of Investment Promotion Agencies (WAIPA) prontu apoia TradeInvest Timor-Leste hodi partisipa iha eventu internasionál sira inklui formasaun.

“Kompromisu iha próxima etapa, hodi nune’e Timor-Leste bele hetan direitu votu iha Asembleia Jerál WAIPA, ne’ebé sei realiza anualmente liuhosi konferénsia mundiál investimentu, hodi kompleta rekezitu legál sira molok sai membru WAIPA,” Xefe Asosiasaun Mundiál hosi Ajénsia Promosaun Investimentu WAIPA, Ismael Ersahin, hateten, liuhosi nota ne’ebé Agência TATOLI asesu, kuarta ne’e.

Nune’e, konvoka enkontru entre parte rua ne’ebé partisipa hosi Prezidente TradeInvest, Arcanjo da Silva, ne’ebé akompaña hosi Delegasaun Timor-Leste hanesan Diretór Ezekutivu SERVE, Florêncio Sanches, Diretora Jerál Asuntu ASEAN, Milena Rangel, Diretór Promosaun Exportasaun TradeInvest Timor-Leste, Decio Ribeiro Sarmento, Diretór Relasaun External no Marketing TradeInvest Timor-Leste Roberto Lai, Diretór Agrokomersiu MAP, Fernando Egidio Amaral.

TradeInvest nu’udar ajénsia ne’ebé fó asisténsia serbisu ba empreza nasionál no internasionál apresia tebes apoiu organizasaun internasionál naun governamentál WAIPA ne’ebé harii iha tinan 1995, liuhosi Konferénsia Nasaun Unida kona-ba komérsiu no ezenvolvimentu.

“TradeInvest ne’ebé atualmente tutela ba Ministériu Koordenadór Asuntu Ekonómiku sei haree kestaun legál sira ne’ebé vigór iha Timor-Leste, hodi nune’e bainhira TradeInvest sai membru WAIPA, sei la prejudika lei sira ne’ebé eziste iha Timor-Leste,” nia akresenta.

Nune’e liuhosi reuniaun ne’e, parte konkorda intensiva liu iha faze tuir mai hodi dezenvolve Mapa Roteiru TradeInvest nian antes sai  membru WAIPA.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here