Komandante Unidade Polisia Fronteira (UPF), Superintendente Euclides Belo. Imajen Tatoli/Francisco Sony

DILI, 30 novembru 2021 (TATOLI)— Komandante Unidade Polísia Fronteira (UPF), Superintendente Polísia Euclides Belo, informa, membru UPF hala’o operasaun iha segunda (29/11), konsege detein sidadaun Indonézia na’in-ida, ne’ebé tenta hakat ilegál fronteira terestre mai Timor-Leste.

“Horiseik dader, ami detein sidadaun Indonézia feto ida iha fronteira Mota-Ain, tanba tama ilegálmente mai iha ita nia rai, liuhosi área tasi ibun Mota-ain nian,” Komandante UPF ne’e, hateten ba Agência TATOLI, via telefónika, tersa ne’e.

Sidadaun Indonézia ne’e ho idade maizumenus tinan 20 tenta hakat ilegál hosi Kupang ho objetivu atu mai vizita família sira iha Timor-Leste.

“Ita nia ekipa sira liuhosi operasaun ne’ebé hetan no detein , hafoin  entrega kedan ba parte Servisu Migrasaun Timor-Leste, hodi deporta kedan ba nia-rain,” Superintendente Polísia ne’e akresenta.

Daudaun, UPF ho Unidade Polísia Militár hahú koopera hodi koloka nia membru sira iha fronteira terrestre entre Timor-Leste no Indonézia atu asegura seguransa.

Nune’e, UPF apela ba sidadaun hotu-hotu ne’ebé hela iha fronteira,atu halo kooperasaun di’ak ho PNTL, bainhira iha ema foun balun halo movimentu presiza informa lalais ba parte seguransa.

UPF mós simu orinetasaun ona hosi Komandu PNTL atu garante nafatin seguransa iha lia fronteira hanesan iha parte Suai, Maliana no Rejiaun Administrativu Espesial Oé-cusse no Ambeno (RAOEA).

“Ami kontinua servisu hamutuk hodi kolabora parte hotu oinsá asegura liña fronteira atu prevene atividade pasajen illegál iha fronteira,” nia konklui.

 Jornalista : Natalino Costa

Eaditór      : Florencio Miranda Ximenes     

PUBLISIDADEiklan

HAKEREK NO HATÁN

Please enter your comment!
Please enter your name here