Embaxadór Portugal iha Timor-Leste, José Pedro Machado Vieira hasai foto hamutuk Diretór Ezekutivu CNC, I.P, Hugo Maria Fernandes no ekipa hafoin enkontru. Imajen/Espesiál

DILI, 29 novembru 2021 (TATOLI)–Governu Portugal liuhosi Embaixada iha Timor-Leste kompromete sei apoiu Centro Nacional Chega, Institutu Públiku (CNC, IP) iha área promosaun direitu umanu, edukasaun, arkivu, rekuperasaun memória, diseminasaun, no divulgasaun informasaun ba públiku inklui rekonsiliasaun.

“Sei fasilita mós CNC hodi asesu dokumentu istóriku sira iha rai-li’ur,” Embaxadór Portugal iha Timor-Leste, José Pedro Machado Vieira, hateten liuhosi nota ne’ebé Agência TATOLI asesu, segunda ne’e.

Inisiativa ne’e hato’o bainhira Embaixadór Portugal hasoru malu ho Diretór Ezekutivu CNC, I.P, Hugo Maria Fernandes, ne’ebé akompaña hosi fiskal úniku, Diretór Divizaun Perskiza Arkivu Istóriku no Xefe Departementu Divizaun Relasaun Externa, Komunikasaun no Advokasia.

Biban ne’e, Embaixadór José Pedro kompromete iha tempu badak nia-laran sei apoiu halo imprime livru Chega no apoiu integra matéria Chega, no mós hanorin matéria istória Timor-Leste ho lian portugés ba estudante sira iha eskola portugés, tantu iha Dili no mós iha munisípiu seluk.

“Ha’u husu CNC, nafatin komunika ho ami-nia Gabinete Embaixadór, nune’e parte rua bele implementa serbisu ho di’ak,” nia akresenta.

Iha biban hanesan, Diretór Ezekutivu CNC, I.P, Hugo Maria Fernandes, agradese ba apoiu ne’e.

“Centro Chega eziste atu implementa relatóriu Comissão de Acolhimento, Verdade e Reconciliação (CAVR)-Chega no Comissão da Verdade e Amizade (CVA), ho totál rekomendasaun 220, ne’ebé halo agrupamentu setorál ba rekomendasaun lima no introdúz ba matéria kona-ba protesaun no promosaun direitu umanu, programa reparasaun ne’ebé fó atensaun ba sobrevivente ne’ebé ho moris vulnerável liu, integra matéria Chega iha edukasaun, apoiu programa sobrevivente no programa internasionaliza Chega,” nia esplika.

CNC, I.P nu’udar memória esperansa ne’ebé hamriik nu’udar institutu públiku ne’ebé estabelese ho dekretu lei númeru 48/2016 no tutela direitamente ba Gabinete Primeiru-Ministru, ho vizaun ‘Sosiedade inkluzivu, la repete istória passadu, moris dame no respeitu ba direitu umanu’.

Enkuantu, misaun instituisaun ne’e mak ‘Harii sentru pós-konflitu ne’ebé prezerva memória pasadu, hodi promove direitu no valór umanu, harii parseria nasionál no internasionál hodi reforsa rede serbisu atu implementa rekomendasaun hosi relatóriu finál CAVR-Chega no CVA – Per Memoriam Ad Spem, sira ne’ebé relevante.’

Jornalista : Arminda Fonseca

Editora : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here