Prezidente Repúblika, Francisco Guterres ‘Lú Olo’. Imajen Tatoli/Jogerjo Guuterres.

BAUCAU, 28 novembru 2021 (TATOLI) – Prezidente Repúblika (PR), Francisco Guterres ‘Lú Olo’ afirma, lider istóriku Kayrala Xanana Gusmão mak rekomenda ba Organizasaun Nasaun Unida (ONU) kona-ba planu pás hodi hakotu konflitu iha Timor-Leste liuhosi 30 agostu 1999.

“Kompatriota hotu-hotu, feto no mane sira, ho fiar katak povu sei hili dalan ukun rasik-an, komandu luta lidera hosi Xanana Gusmão hato’o ba ONU planu pás ida atu hakotu konflitu iha Timor-Leste liuhosi referendu,” Xefe Estadu, hateten, iha ámbitu komemorasaun loron Proklamasaun Independénsia Unilaterál 28 novembru ba dala-46 (1975-2021), ne’ebé tinan ne’e realiza iha munisípiu Baucau, domingu.

Ikus mai, iha loron 30 agostu 1999 realiza duni referendu ho supervizaun hosi ONU no maioria povu la hili autonomia ho Indonézia. Signifika katak hamriik mesak nu’udar Estadu soberanu ida, tanba ne’e restaura indepedénsia iha 20 maiu 2002 ho rekoñesimentu internasionál. 

Komandante Ma’Huno (klaran) no Saudozu Ma’Hudo Raan Kadalak tuur hamutuk no konversa ho Komandu Luta Nian, Kay Rala Xanana Gusmão, hodi trasa Timor-Leste nia ukun rasik-aan. Imajen/Espesiál.

Prezidente Repúblika konvida kompatriota, joven atu refleta ba-oin, hanoin furak, hahú hosi grupu joven ki’ik ida iha dékada 70, biar Timor rai ki’ik tebes, fahe ba reinu oinoin ho dezenvolvimentu kiik loos, maibé iha situasaun defísil ne’e grupu joven sira hakuak mehi boot, katak Timor-Leste tenke ukun rasik-an.

Nia haktuir, liuhosi kampaña boot ida hala’o hosi líder polítiku sira no joven nasionalista sira, hafoin 25 abríl 1974, mehi ne’e nakfilak ba luta koletiva ida bainhira sentidu povu no pátria hametin iha territóriu nasionál.

Mehi no hakarak atu kore-an hosi kolonializmu nakfilak tebes sai realidade bainhira Prezidente Francisco Xavier do Amaral ho naran Komité Sentrál FRETILIN (CCF, sigla portugés) proklama iha 28 novembru 1975 nu’udar Estadu ida ho karáter republikanu.

“Atu proklamasaun ne’e iha tempu ne’ebá reprezenta konkista boot ba ita-nia istória libertasaun nasionál tanba hahoris liután sentidu Estadu perténsia ba povu ida,” Eis Prezidente Parlamentu Nasionál ne’e haktuir.

Biar Timor-Leste hatuur-aan tiha ona nu’udar país soberanu, livre no independente ho nia konstituisaun no governu rasik ho naran RDTL maka diplomata no ativista Timor-oan hamutuk ho belun sira hatutan luta no determinada iha mundu tomak.

Purtantu, iha Timor-Leste hatuur baze apoiu nu’udar ba rezisténsia tomak liuhosi forsa espíritu organizasaun, sentidu rezisténsia, espíritu sakrífisiu no ajuda malu.

“Ho baze apoiu mak ita reforsa liután ita-nia identidade no unidade nasionál no hasa’e liután ita-nia matenek, barani no determinasaun atu hasoru luta naruk no difisil tebes. Iha pasadu difisil nakonu ho terus, susar no mate Igreja Katólika sai nafatin forsa boot ida hosi vertente sosiál no kulturál no halo defeza povu-nia direitu ba identidade rasik,” Lú Olo subliña.

Kondekora Asu’ain 52

Iha ámbitu ne’e, Prezidente Repúblika kondekora asu’ain na’in-52, hodi valoriza no fó rekoñesimentu ba kontribuisaun iha prosesu luta, ne’ebé ikus mai Timor-Leste hamriik mesak nu’udar nasaun soberanu ida. 

Primeiru Ministru, Taur Matan Ruak, fó kondekarasaun orden koolar ba veterana sira. Imajen Tatoli/Jogerjo Guterres.

“Hosi esforsu tomak mak ita hetan vitória boot ida-ne’e, moris ho liberdade tomak iha ita-nia rain nu’udar Timór-oan ho ita-nia hanoin no hakarak rasik,” nia katak.

Xefe Estadu sente ondra no orgullu kondekora ema na’in-39 ho orden Timor-Leste nian, nune’e mós kondekora asua’in na’in-13 ne’ebé mate iha funu laran ka hafoin restaura independénsia. 

Nune’e Xefe Estadu ho naran Estadu nian presta omenajen espesiál ba eroína, eroi no mártir, instituisaun relijioza, diplomata lima ho dedikasaun eskluziva nomoos ativista Timor-oan iha rai-li’ur ne’ebé hala’o serbisu ho fiar metin katak sei ukun-an.

Biban ne’e, Fracisco Guterres Lú Olo hato’o haksolok no hato’o omenajen mós ba organizasaun solidariedade internasionál no belun idaik-dak ne’ebé luta hamutuk ho Timór-oan sira atu hetan direitu ba ukun rasik-an.

Agradese luta Portugál

Prezidente Repúblika mós lori Estadu Timor-Leste hato’o agradese ba governu Portugál ne’ebé apoia kedas dezde prosesu luta ho meiu oinoin, liuliu nasaun sira-ne’ebé iha ligasaun istória ka ko’alia lian membru Estadu ne’ebé hola-parte iha CPLP to’o ohin loron.

“Iha loron ida ohin, ha’u hasa’e aas no hato’o agradesimentu mós ba esforsu hotu-hotu ne’ebé Portugál iha ONU nu’udar poténsia administrante atu ita manán direitu hili rasik ita-nia destinu liuhosi referendu nian,” Lú Olo rekoñese.

Prezidente Repúblika apela espesiál ba kombatente no sobrevivente sira atu sai modelu di’ak ba kompatriota hotu-hotu, katak valór no prinsípiu ne’ebé tane-metin ita-nia unidade nasionál no lori vitória iha referendu 1999.

“Biar idak-idak ho hanoin rasik, ha’u fiar katak ita bele tuur hamutuk hodi hetan estratéjia liuhosi implementasaun Planu Estratéjika Dezenvolvimentu Nasionál atu valoriza duni eroína no eroi sira-nia sakrifísiu ba Timor-Leste. Ha’u konvida malu kompatriota-sira hotu atu kaer hanoin ida ho hakarak ida de’it, kore-an hosi ki’ak no mukit nu’udar povu Timor-Leste nian,” Lú Olo akresenta.

Jornalista         : Antónia Gusmão

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here