Ekipa responsável komemorasaun loron nasionál munisípiu Bobonaro hasa’e bandeira nasionál iha ámbitu komemorasaun loron Proklamasaun Independénsia ba dala-46, iha kampu futeból, suku lahomea, domingu (28/11). Imajen TATOLI/Sérgio da Cruz

BOBONARO, 28 novembru 2021 (TATOLI)—Ministru Transporte no Komunikasaun (MTK), José Agostinho da Silva, ne’ebé sai inspetór iha seremónia komemorasaun loron Proklamasaun Independénsia ba dala-46 iha Bobonaro, louva partisipasaun másimu komunidade lokál.

“Apresia tebes ba komunidade no komisaun organizadora, maski preparasaun seremónia ne’e ho durasaun tempu limitadu, iha loron-15 nia laran de’it, maibé ohin ita haree atividade iha terrenu la’o di’ak tebes, maski iha difikuldade tanba ita la perfeitu, maibé hosi ne’e ita komesa avalia etapa pur etapa ba oin ita bele hadi’a di’ak liután,” Ministru hateten iha fatin komemorasaun loron nasionál, iha kampu futeból, suku lahomea, postu Maliana, munisípiu Bobonaro, domingu ne’e.

Iha biban hanesan, Abitante, Calisto da Costa, haksolok no agradese ba Governu, tanba maski enfrenta situasaun COVID-19, maibé bele realiza atividade oioin hodi anima komunidade, ne’ebé refleta ba istória luta pasadu hodi sai sidadaun ho sentidu patriotizmu no nasionalizmu ba nasaun.

“Loron ohin importante tebes mai povu, tamba ne’e ohin hau mai partisipa iha seremónia ne’e atu fó onra ba eroi sira ne’ebé sakrifika no dedika-an ba libertasaun povu tomak,” nia akresenta.

Nune’e, nia husu ba Governu atu aumenta orsamentu ba autoridade munisipál, nune’e bele realiza atividade feira produtu lokál no artezenatu hodi valoriza produtu lokál ba públiku iha loron istóriku sira.

“Grupu produtiva iha Bobonaro barak maibé iha momentu ida sira labele mai halo promosaun ba produtu tamba orsamentu ba realizasaun atividade ne’e la sufisiente, entaun produtu ne’ebé sira prodúz mós la folin,” Calisto da Costa akresenta.

Atividade komemorasaun loron 28 novembru hahú tuku 09:00 dadeer ho seremónia isar bandeira nasionál, ne’ebé akompaña ho parada estudante hamutuk na’in-114 hosi Eskola Don Martinho da Costa Lopez, Sentru Aprendizajen Informasaun Eskolár (CAFÉ, sigla portugés) Maliana no Eskola Tékniku Vokasionál Informátika, ho formatura hosi Polísia Nasionál Timor-Leste (PNTL) Komandu munisípiu Bobonaro, Bombeiru, Seguransa Sivil, funsionáriu servisu munisipál, inklui ekipa hasa’e bandeira hosi suku Hitu no estudante sira.

Aleinde ne’e, membru Governu prezide Um Minuto de Silêncio ba eroi sira, hafoin loke gravasaun audiu textu Proklamasaun Independénsia hosi Proklamatór, Fransisco Xavier do Amaral no tama kedas ho diskursu Prezidenti Repúblika, Fransisco Guterres ‘Lú Olo’, ne’ebé lee hosi Ministru José Agostino.

Hafoin ramata, kontinua ho animasaun drum band hosi eskola Colégio Infante Sagres Maliana durante besik minutu 2, ne’ebé iha ámbitu ne’e estudante sira hatudu kreatividade ho múzika intrumentál no poezia.

Aleinde ne’e, iha kompetisaun dada tali no aprezentasaun dansa tradisionál, ne’ebé partisipa hosu suku Saburai, Holsa, Odomau, Ritabou, Raifun, Tapo-Memo no Lahomea.

Iha biban ne’e, parte komisaun organizadora atribui sertifikadu apresiasaun ba grupu parada hosi estudante 114.

Seremónia ne’e partisipa hosi Sekrtáriu Autoridade munisípiu Bobonaro, Julio Carvalho Caero, Eis Prezidente Autoridade Bobonaro, Jeferino dos Santos, Komandante Polísia Komandu munisípiu Bobonaro, Superintendente Antinho Mauluta, Veteranu no Veterana, Administradór postu, kargu xefia servisu munsipál no sektorál, autoridade lokál, membru FALINTIL-Forsa Defeza Timor-Leste (F-FDTL) no  PNTL inklui komunidade suku hitu iha postu administrativu Maliana.

Ba realizasaun seremónia no atividade loron nasionál ne’e, Autoridade Bobonaro hetan orsamentu hamutuk $18.000, ne’ebé distribui ba postu administrativu Bobonaro $1.500, Atabae $1,000, Balibo $1.000, Cailaco $1.000, Lolotoe $1.000 no Maliana $700, enkuantu $7.500 hodi halo preparasaun atividade iha nível munisípiu to’o ramata.

Jornalista : Sérgio da Cruz

Editor        : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here