Sasin ba saudozu David Alex Daitula nia mate, José Anotónio Belo "Tarlaeu". Imajen Tatoli/Francisco Sony.

BAUCAU, 27 novembru 2021 (TATOLI) – José António Belo ‘Taraleu’ daudaun ne’e prepara hakerek livru kona-ba Vise-Xefe Estadu Maiór, saudozu David Alex ‘Daitula’ ninia  partisipasaun iha prosesu luta to’o hakotu iis iha kampu batalla.

“Agora daudaun ha’u iha obra ida, kolega sira rekolla ona dadus, atu hakerek livru, ne’ebé ami entrevista ona veteranu antigu 48, sei falta 32 atu kompleta ba na’in-80 ba halo impresaun volume dahuluk ninian,” Taralelu nu’udar sasin ne’ebé akompaña Komandante Daitula iha prosesu luta, ko’alia iha serimónia reflesaun iha aldeia Worititi, suku Caibada, postu administrativu Baucau, munisípiu Baucau, sábadu ne’e.

Durante iha prosesu luta ne’e, Komandante Daitula hetan entrevista hosi jornalista na’in-tolu mai hosi Televizaun ABC. Rezultadu hosi intervista ne’e hatudu gravasaun katak Komandante Daitula fiar ba ninia-aan, fiar ba ninia povu tanba ne’e maka nia mobiliza povu ba ukun rasik-aan. 

Hafoin intervista, Komandante Daitula tún ba subar iha diresaun ida iha eskola Ualili nia leten, entre loron 19 no 20 fulan-juñu 1997 lokraik, ho orden hosi komandante, haloot sasán tún mai diresaun Buibau hodi hasoru malu Kaibada Makasae.

Istória iha prosesu luta

Entre loron 21 no 22 fulan-juñu tinan 1997 dadersan, Komandante Daitula bolu Taraleu dehan nune’e “O bele ka lae ba observa took dalan ba diresaun Kaibada ba mosu iha Kaisidu, Waiono ka sai ba Bucoli tanba iha serbisu balun ne’ebé ita tenke halo”.

Entaun momentu ne’ebá, ha’u mai ho kolega ida, tanba ha’u la hatene dalan sai hosi portu nian atu liu mai korta estrada entaun komandante Daitula fó orientasaun ba kolega ida akompaña ha’u liuhosi diresaun ne’e.

Ami na’in-rua la’o iha Kaibada depois kolega ne’e lokraik ba kedas Kaisidu hodi halo observasaun, no nia fila mai ba fali Kaibada Makasae depois ha’u hela iha fatin ne’e durante loron rua halo observasaun, ba to’o Waiono toba iha Waikua ninian.

Haree tiha informa iha-ne’e hetan informasaun katak, militár Indonézia tún iha ne’e durante loron lima antes.

Ha’u fila-fali loron 24 fulan-juñu tinan 1997 lokraik, rai nakaras ona, komandante sira haloot sasan tiha ona, komandante bolu hodi husu situasaun oinsá. Nune’e, ha’u informa situasaun katak loron lima liubá tantara tún iha-ne’ebá depois fila-fali, oinsá ho Kaisidu no oinsá ho Bucoli nian?

Ha’u to’o ne’ebá, ha’u husu ba populasaun katak tantara sira latún iha-ne’ebá no ha’u informa tiha ba komandante, no komandante ne’e ita hein mana Una Bui maibé hein be hein mana Una la mosu, entaun komandante dehan ita tún ba subar iha kraik.

Nune’e, ami tún ba tasi-ibun korta iha komarka Kaisahe nian, ami hakat liu estrada, ami tún iha natar ba to’o tasi-ibun. To’o ne’ebá atu subar iha fatuk kuak ida hodi tún ba tasi-laran hodi tama ba kuak laran.

Entaun mosu preokupasaun kona-ba fatin ne’e, depois komandante bolu, Taraleu ita ba diresaun dalan ida o ba haree ne’e liu hosi estrada boot ne’e maizumenus oras hira.

Ha’u dehan pelumenus lori oras ida ka lais liu lori minutu 30, ita korta ona estrada más ita liu ba sorin ne’ebá ne’e lori oras haat karik, entaun ko’alia Pai (Daitula) hateten ita avansa tanba fatin ne’e labale subar. Subar iha-ne’ebá maka inimigu deteta mai ró para iha tasi-laran, tiru tama ba fatuk ku’ak sai ladi’ak.

Ami la’o tesik mai hosi diresaun ida ne’e (Kaibada), komandante Daitula dehan ba kolega klandestina ida mai hosi Manatuto oinsá. Kolega ne’e hateten aban presiza hasoru ema-ne’e, estafeta ida mai hosi Laclo, kolega ne’e sei moris naran João Mauleki Soares. 

Primeiru Ministru, Taur Matan Ruak, hamutuk ho Chefe Estadu Maiór Jenerál FALINTIL-FDTL Tenente Jenerál Lere Anan Timur no Veteranus balun vizita fatin mate saudozu David Alex Daitula nian. Iha Woratiti, Suku Caibada, Postu Baucau Villa Munisípiu Baucau, sabadu (27/11). Imajen Tatoli/Francisco Sony

Ami mai to’o iha fatin ne’e, depois kolega sira dehan marka pontu atu enkontru entaun marka iha ai-hun (Hali ida ne’e nu’udar subar-fatin Daitula to’o kaptura). Ami liubá tua-laran sorin ne’ebá atubele hasoru malu ho kolega ida mai hosi Manatuto.

Entaun ha’u husu fali, aban ne’e sé mak lori kolega ne’e, entaun Pai Daitula dehan o hatene halo o-nia serbisu. Nune’e ami arranka ba to’o sorin, ha’u ho kolega ida ami-rua ba uma atu fó hatene ema iha-ne’ebá katak ha’u-nia inan-aman, ha’u-nia alin atu ba sosa matabixu ba ami.

Depois ba, maun ne’e subar iha li’ur, ha’u mak ba ko’alia ho ha’u-nia inan-aman no ha’u-nia alin. Sira ba hola tiha matabixu, sira mai tarde depois ha’u fó hatene tiha kolega klandestina (Halkim) no sira-rua tán mak Abilio ho Manuel, favór ida haree hela seguransa.

Iha tuku 10:00 dadeersan, ami na’in-tolu loke matan, ha’u hatais kamiza metan ida, ami na’in-tolu ba hein sira iha Halihun ne’ebá, ami to’o kolega sira mós to’o tiha ona, ami ko’alia pur volta menutu 30. Ha’u sei rona Pai husu ba kolega ne’e (Ema Laklo-oan) karik ha’u ba iha Manatuto, imi subar ha’u? sira dehan prontu.

Militár Indonézia serka derrepente

Ami ko’alia kuaze minute 30, derrepente ema hamriik haleu ami. Ami hamriik halai ema tiru ami, Pai halai iha klaran, maun Roque tuir no ha’u tuir, depois ha’u uluk fali, maun Roque tuir no Pai ikus, depois ami-rua halo oinsá asegura katuas sai. 

Primeiru Ministru, Taur Matan Ruak, hamutuk ho Chefe Estadu Maiór Jenerál FALINTIL-FDTL Tenente Jenerál Lere Anan Timur no Veteranus balun vizita subar fatin saudozu David Alex Daitula Iha Woratiti, Suku Caibada, Postu Baucau Villa Munisípiu Baucau, sabadu (27/11). Imajen Tatoli/Francisco Sony

Ami halai tesik mai iha fatin-ne’e, ema tiru kona Pai nia liman, ami-rua maun Roque halai liu no Pai monu hela, mais maun Roque dehan, ita labele halai tanba katuas monu. Maibé ami-rua halai tán fali ba subar iha fatuk kuak. Maibé to’o mai bapa sira hamriik haleu, sira la koñese katak ami ne’e ema ai-laran, sira dehan sira fó hán GPK mak ne’e.

Nune’e, derrepente señor ida naran Manuel Ariati membru Saka ida, nia mak hamriik hateten ne’e David Alex.

Iha momentu ne’ebá, HT (rádiu) ne’ebé mak Pai lori ne’e aat derrepente tanba atu kontaktu ba grupu ida iha sorin ne’ebá la tama. Ne’ebé kaer tiha, maizumenus iha tuku 12:00, sira hahú obriga ami.

Depois Pai kanek ami lori pai ba to’o Watabó, sira lori karreta mai tula ami, sira obriga ami-na’in haat mak hulan. Kolega ida naran Gil Vicente Correia (Seiçal-oan), João Mauleki Soares (Laclo-oan) nia hetan ko’a iha tilun. No Pai (Daitula) hetan kanek iha liman karuk no ain-loos.

Komandante ida mai hamutuk ho majór ida naran Paulos nia ikus liu hanesan danjen Kopassus, depois nia foin lalais lori fila-fali maun boot Xanana nia kilat mai entrega iha Dili.

Mai iha Dili, ha’u (José Belo ‘Taraleu’) ba husu nia katak, ita boot dehan ha’u-nia aman sei moris ne’e ita boot husik iha-ne’ebé, maibé nia dehan ami tentara ne’e iha ami-nia regra. 

“Ha’u atu hateten de’it katak ha’u la mai atu julga kolega sira, no ha’u mós la mai atu defende-an. Ha’u moris ho todan ida-ne’e durante tinan 23 no fulan-lima iha ha’u-nia moris. Ha’u bele tur ho kolega sira ko’alia, hamnasa kada menutu nunka haluha, Daitula la’o ho ha’u, iha ha’u-nia moris tomak, ida-ne’e mak todan”, nia dehan.

Ikusliu, Prezidente RTTL, E.P. ne’e husu Primeiru Ministru Taur Matan Ruak, hakotu todan ne’ebé nia enfrenta durante tinan naruk.

Jornalista         : Antónia Gusmão

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here