Jogador Ramelau FC halo selebrasaun hafoin simu premiu husi SEJD nudr kampiaun ba Futsal Praliga 2020/2021 iha kampu Futsal Fatuhada, sesta 26/11/2021. Imajen Tatoli/Antonio Goncalves

DILI, 26 novembru 2021 (TATOLI)— Klube Ramelau FC sai kampiaun iha Pra Liga Futsál Timor-Leste (LFTL) 2020-2021, tanba hahú jogu jornada dahuluk to’o ikus okupa númeru dahuluk iha tabela klasifikasaun ho pontu 58.

Liuhosi jogu, ohin loraik, iha kampu Salaun Kuartel Jenerál F-FDTL, Fatuhada, sesta (26/11), Boa sorte konsege hatama golu rua, liuhosi Jogadór Abríl ho númeru kamizola 46, iha minutu 15 no jogadór Salvadór ho kamizola númeru 9 iha minutu 25. Enkuantu golu ida hosi Ramelau FC hatama hosi jogadór Jóe ho númeru 9.

Maski, ekipa Boarte Sorte halakon Ramelau FC, maibé nia pontu ho de’it 43, ne’ebé oportunidade nafatin monu ba Ramelau FC atu sai kampiaun tanba lidera topu klasifikasaun ho pontu 58.

jogadór Ramelau kamiola mutin hadau malu bola ho jogador Boa Sorte FC iha joga Futsal Praliga 2020/2021 iha kampu Futsal Fatuhada, sesta 26/11/2021. Imajen Tatoli/Antonio Goncalves

Ho rezultadu manán 2-1, Boa Sorte konsege sa’e ba okupa klasifikasaun dahaat iha Pra-Liga Futsal Timor-Leste ho pontu 43 hodi dudu ses Taibesi FC ba klasifiksaun dalimak

Nune’e, Ramelau FC, Boa Sorte FC, Becusse United, Mauputar FC, São Francisco Xavier, Caesardante FC, AD Samoro, Gamer FC no Jerman FC mak utrapasa ba primeiru divizasaun Pra Liga futsal Timor-Leste iha epoka 2022.

Hafoin jogu termina, Sekretaria Estadu Juventude no Desportu  (SEJD), Abrão Saldanha, kongratula ba  klube Ramelau FC tanba  konsege sai kampiaun iha Pra Liga Futsal Timor-Leste epoka ne’e. .

“Ha’u fó parabéns ba imi (Ramelau FC) tanba konsege sai kampiuan ba iha kompetisuan Pra- Liga Futsal Timor-Leste epoka ne’e ,” Sekretaria Estadu ne’e, hateten liuhosi intervesaun hodi ensera jogu Pra-Liga Futsal Timor-Leste 2020-2021.

SEJD mós louva komisaun organizadór no estrututura asosiasaun Futsal Timor-Leste nian tanba bele organia eventu hodi anima komunidade ho susesu tebes.

“Ha’u fiar liga futsal sei la’o di’ak no ha’u mós sei loke tan atividade jogu futeból juvenil iha tinan oin,” SEJD ne’e garante.

Iha biban hanesan, Sekretaria Jerál Pra-Liga Futsal Timor-Leste, Fernado da Silva Xavier, kongratula mós Ramelau FC ne’ebé sai kampiaun ba iha Pra Liga Futsal Timor-Leste.

“Parabéns ba imi no husu atu kontinua treinu nune’e bele kompete iha primeira divisaun pra liga futsal Timor-Leste ne’ebé sei halo iha tinan oin,” nia kongratula.

Sekretáriu Jerál ne’e mós husu ba klube 10 atu kontinua prepara fíziku no tékniku hodi kompete  iha Pra Liga Futsal Timor-Leste iha epoka 2022.

Ramelau FC ho Boa Sorte foto hamutuk iha joga ikus Futsal Praliga 2020/2021 iha kampu Futsal Fatuhada, sesta 26/11/2021. Imajen Tatoli/Antonio Goncalves

Iha epoka ne’e, kampiaun Ramelau FC hetan premiu ho osan $3.000 ne’ebé atribui direita husi SEJD Abrão Saldanha, segundu lugar Mushila FC ho osan $2.500, terseiru lugar Mauputar FC ho osan $2.000 no kuartu lugar Boa Sorte FC   ho osan $1.000.

Nune’e, klube sira ne’ebé maka okupa kintu lugar to’o tabela ikus hetan subsídiu de’it hosi Asosisaun Futsal Timor-Leste ho montante $400.

Enkuantu, SEJD atribui mós premiu $300 ba mellor markadór iha kompetisaun Pra Liga Futsal Timor-Leste Venceslau Guterres hosi Taibesi FC ho golu 50.

Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here