Abertura kampaña nasionál ativizmu kontra violénsia hasoru feto no labarik feto iha suku Manucasa, kinta (25/11). Imajen/SEII

DILI, 26 novembru 2021 (TATOLI)-Sekretaria Estadu Igualdade no Inkluzaun (SEII) hamutuk ho Vise-Prezidente Grupu Mulher Parlamentár Timor-Leste (GMPTL) halo abertura ba kampãna nasionál ativizmu kontra violénsia hasoru feto no labarik feto iha suku Manucasa, postu administrativu Lequidoe, munisípiu Aileu.

Kampaña loron-16 ne’e hahú loron 25 novembru to’o 10 dezembru 2021 iha territóriu Timór laran tomak.

Sekretária Estadu Igualidade no Inkluzaun, Maria José da Fonseca Monteiro de Jesus, hateten, objetivu kampaña mak atu hasa’e koñesimentu ema hotu prevene no kombate violénsia hasoru feto no labarik feto.

“Violénsia laiha fatin iha ita-nia rai, tanba ne’e labele hamosu violénsia iha uma-laran no komunidade hodi feto no labarik feto sai vítima ba violénsia. Tanba violénsia ne’e ladi’ak no halo ema moris la kontente no futuru ladi’ak. Ita hotu konkorda katak violénsia estraga futuru nasaun no sei halo família moris la haksolok, labarik ida labele dezenvolve nia-an ho di’ak, feto labele moris ho ksolok, labele moris iha família ho di’ak no barak tenke lakon moris,” Sekretária Estadu hateten liuhosi nota ne’ebé Agência TATOLI asesu, sesta ne’e.

Aleinde ne’e, inisiativa ne’e bele hametin liña koordenasaun rede referál ne’ebé serbisu no fó atendimentu ba vítima atu hamutuk kombate violénsia kontra feto asesu ba justisa formál no enkoraja vitíma atu brani ko’alia sai violénsia ne’ebé sira hetan no uza mekanizmu formál rezolve kazu violénsia kontra feto no labarik feto.

Atu halakon violénsia hasoru feto no labarik feto, ohin loron mundu tomak iha fatin hotu, halibur malu reprezenta esperansa no futuru livre hosi violénsia.

“Bainhira ita uza kór laranja, ita hakarak hatudu ba ema katak ita ne’ebé uza kór ne’e kontra violénsia hasoru feto, labarik-feto, maluk portadora defisiénsia, no komunidade LGBTQI, inklui hasoru sé de’it iha família no  sosiedade,” nia akresenta.

Iha biban hanesan, Vise-Prezidente GMPTL, Domingas dos Santos, ne’ebé reprezenta Prezidente grupu ne’e hato’o intervensaun, katak feto Timor-Leste nia preukupasaun sai hanesan komponente fundamentál iha nasaun no Estadu, ne’ebé kaer prinsípiu no valór fundamentál hotu ne’ebé konsagra iha Konstituisaun katak programa hotu tenke hanesan ba ema hotu sein iha diskriminasaun atu moris no fó protesaun másima iha prosesu dezenvolvimentu rai-laran.

“Direitu feto hanesan direitu umanu no konsidera violénsia kontra feto no labarik feto sira hanesan violasaun todan no jeneralidadu iha direitu umanu, aleinde sai hanesan forma diskriminasaun maka’as. Ho sistema patriarkál ne’ebé ita iha, fó liu benefísiu ba maluk mane sira hodi halo tratamentu mínimu ka menór ba feto iha uma-laran rasik no iha komunidade nia le’et,” governante ne’e dehan.

Nune’e mós, Administradór munisípiu Aileu, Abel da Conceição, hateten, aktu violénsia hasoru feto no labarik feto ne’e krime, tanba ne’e husu ba komunidade suku Manucasa iha munisípiu Aileu laran atu hato’o keixa bainhira akontese violénsia ruma iha uma-laran.

“Ha’u la konkorda kuandu aktu kontra violénsia doméstika rezolve hanesan família, karik maluk mane sira-nia aktu ne’ebé hatudu liu ba krime, tenke prosesa tuir ita-nia lei ne’ebé mak iha, atu nune’e labele abitua ho hahalok sira hanesan ne’e,” Autoridade lokál ne’e dehan.

Aleinde halo abertura kampaña ativizmu kontra violénsia hasoru feto no labarik feto, hala’o mós diálogu komunitáriu no lansamentu ba múzika kampaña inklui website hosi Plan International, liga ba prevensaun violénsia bazeia ba jéneru.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here