Prezidente Repúblika, Francisco Guterres Lú Olo. Imajen António Gonçalves

DILI, 26 novembru 2021 (TATOLI)—Prezidente Repúblika, Francisco Guterres Lú Olo, iha 25 novembru, liuhosi Dekretu Prezidente Repúblika númeru 102/2021, iha ámbitu selebrasaun Proklamasaun Independénsia sei kondekora sidadaun nasionál na’in-52.

Iha selebrasaun Loron Proklamasaun Independénsia kada tinan, Prezidente Repúblika hatudu rekoñesimentu no valorizasaun, liuhosi kondekorasaun ho “Ordem Timor-Leste”, ba sidadaun sira-ne’ebé kontribui no halo sakrifísiu ba país tanba hatudu ona espíritu patriotizmu ne’ebé aas tebes, liuhosi sira-nia dedikasaun tomak, inklui entrega sira-nia vida rasik ba libertasaun pátria.

“Sidadaun na’in-lima (5) sei simu kondekorasaun ‘Kolar Orden Timor-Leste’ ho títulu póstume, na’in-ida (1) sei hetan kondekorasaun ‘Kolar Orden Timor-Leste’, sidadaun na’in-ualu (8) sei simu kondekorasaun ‘Medalla Orden Timor-Leste’ títulu póstume, sidadaun na’in-38 sei hetan kondekorasaun ‘Medalla Orden Timor-Leste,” refere komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, Bairru Pite, Dili, sesta ne’e.  

Iha Dekretu Prezidente Repúblika fó-sai katak ema hotu-hotu iha dever atu rekoñese no valoriza asaun patriotizmu, dedikasaun no sakrifísiu boot hirak ne’ebé mak sidadaun sira-ne’e hatudu ona durante tempu luta ba ukun-an. Sira sakrifika sira-nia tempu juventude no husik oportunidade atu bá tuir edukasaun formál iha eskola tanba hakarak liberta sira-nia rain doben Timor-Leste.

Ohin, Estadu no Nasaun tomak fó rekoñesimentu no valorizasaun, liuhosi kondekorasaun orden Timor-Leste, ba knaar importante hirak ne’ebé mak sidadaun nasionál sira-ne’e hatudu tiha ona.

Tuir Dekretu-Lei númeru 20/2009, Ordem Timor Leste nu’udar rekoñesimentu hosi Estadu ba ema estranjeiru ka sidadaun nasionál, ne’ebé mak liuhosi sira-nia atividade profisionál, sosiál ka asaun espontánea nakonu ho korajen, fó kontribuisaun boot ba Timor-Leste ba timor-oan ka ba umanidade.

Jornalista : Nelson de Sousa

EDitór     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here