Jogador Ponta Leste selebra golu iha primeiru divizaun LFTL. Imajen/media LFTL

DILI, 26 novembru 2021 (TATOLI)– Ekipa Ponta Leste marka istória foun, iha sesta (26/11), hafoin manán nia adversáriu Lalenok United FC, iha jogu primeira divizasaun, Liga Futeból Timor-Leste (LFTL), iha estádiu Munisipál Dili.

Ponta Leste konsege harahun istória ne’ebé falun hela iha liga Timor-Leste tanba hahú iha 2019 to’o agora laiha ekipa ida mak mak manán Lalenok tanba sai kampiaun dala-rua tutuir malu ba LFTL, tasa 12 Novembru no Kopa FFT.

Jogu ne’ebé  fó vitória ba Ponta Leste ne’e, hahú iha primeiru parte ekipa rua lansa kontra no atake ba malu másimu ho ambisaun makas atu buka manán,  maibé hosi minutu ida too minutu 30 laiha golu ruma mak akontese.

Maski nune’e, ekipa rua hala’o jogu ho modelu defensivu hodi duir bola as atu ataka makas, maibé la kona alvu.

Jogador Ponte Leste selebra hafoin hatama golu ba Lalenok FC. imajen/ media LFTL.

Nune’e, iha minutu 35 sorte di’ak ba Ponta Leste liuhosi nia jogadór Ejivanio Costa (7) lansa golu hodi muda rezultadu ba 1-0.

Hosi golu ne’e, hamate kedan esperansa Lalenok nian atu prodús golu tanba jogadór Ponta Leste halo atake ne’ebé makas hodi hamate tutuir Lalenok nia jogu. Ho nune’e,  to’o minutu primeira parte termina laiha tan golu ruma mak akontese no vitória hela provizóriu ba Ponta Leste.

Dolar ba segunda parte ekipa rua lansa nafatin kontra no atake ba malu, maibé Ponta Leste hala’o jogu barak liu ho defensivu ne’ebé Lalenok jogu ho ofensivu labele halo golu ruma, nune’e too jogu ne’e termina laiha tan golu ruma mak akontese. Nune’e vitória save metin kedan ba Ponta Leste.

Hosi vitória ne’ebé Ponta Leste rekolla fó oportunidade ba ekipa ne’e hodi ba tuur iha pozisaun   segundu tabela klasifikasaun provizóriu ho pontu neen. Enkuantu Karketu nafatin tur iha pozisaun dahuluk ho pontu neen, maibé diferente ho golu.

Nune’e, mós Lalenok okupa iha pozisaun datoluk ho pontu tolu, SLB iha pozisaun dahaat ho pontu ida, Aitana okupa pozisaun da-lima ho pontu ida no DIT no Assalam tuur iha zona mean tanba laiha pontu.

Notísia Relevante: Ponta Leste prontu kontra Lalenok iha LFTL

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here