Ekipa jogadór FC Becune halakon FC Binipu iha jogu 4 finál Kopa AFO sub-22. Imajen Tatoli/Abílio Elo Nini.

OÉ-CUSSE, 26 novembru 2021 (TATOLI) – Ekipa FC Becune halakon ekipa FC Binipu iha 4 finál iha jogu Kopa Asosiasaun Futeból Oé-Cusse (AFO) sub-22 ho rezultadu 3-2, nune’e ekipa FC Becune hakat ba finál hodi hadau taxa époka 2021 nian.

Jogu 4 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) iha sesta ne’e, ekipa jogadór FC Becune hakat ba finál sei hasoru ekipa FC Amor Oébau sei joga iha 30 novembru ne’e hodi hadau taxa Kopa AFO sub-22.

Jogu primeira parte ho durasaun menutu 45, ekipa rua ne’e lansa kedas kontra no atake tuir téknika no abilidade ekipa idak-idak nian ne’ebé orienta hosi treinadór sira, tanba jogu iha primeira parte ekipa rua hatudu rezultadu 2-2.

Jogu iha primeira parte ne’e, la’o to’o menutu 13 Becune FC lansa golu dahuluk liuhosi jogadór Reginos Falo númeru kamizola 10, hodi hatuur uluk rezultadu 1-0. Rezultadu ne’e lori sorti di’ak ba ekipa FC Becune, tanba jogu liu de’it menutu 5 iha menutu 18 jogadór Mateus Nautos númeru kamizola 7 lansa-tán golu ba daruak hodi muda rezultadu ba 2-0.

Maske nune’e, ekipa FC Binipu hahú esforsu to’o fali menutu 25 jogadór Jefriano Meni númeru kamizola 17 lansa golu hodi muda rezultadu 1-2, rezultadu ne’e halo ekipa FC Binipu hahú esforsu maka’as liután tanba jogu liu de’it menutu 4 iha menutu 29, jogadór Nelson Mendela Nunes númeru kamizola 7 lansa golu, hodi muda rezultadu 2-2.

Jogu primeira parte kontinua la’o to’o termina ho menutu 45, ekipa rua hatudu forsa hanesan tanba ho rezultadu 2-2.

Hakat ba segunda parte ho durasaun menutu 45, ekipa rua kontinua hatudu sira-nia jogu ho tátika no abilidade ne’ebé iha, tuir orientasaun ne’ebé treinadór sira orienta, maibé Becune FC sorti liu iha jogu segunda parte.

Tanba jogu kontinua la’o to’o menutu 84, jogadór Mateus Nautos lansa golu, hodi muda rezultadu ba 3-2, nune’e jogu segunda parte termina ho menutu 90, FC Becune hakat ba finál Kopa AFO sub-22 époka 2021.

Nune’e treinadór FC Binipu, Januário da Costa, klarifika razaun ekipa lakon tanba jogadór sira ladún serbisu hamutuk nune’e fó oportunidade ba ekipa FC Becune hodi lansa golu.

“Ami lakon la’ós tanba jogadór sira fraku maibé jogu ladún unidade hodi serbisu hamutuk, maske domina bola iha kampu maibé jogu ho hirus ida-ne’e mak ami lakon iha-ne’e, maibé la problema ami sei hadi’a ami-nia jogu tuir mai hodi hadau terseira lugár, iha 29 novembru ne’e,” nia katak.

Treinadór FC Becune, Domiziliano Koi, agradese ba jogadór sira tanba konsege hatudu jogu di’ak hodi aplika dixipliña tuir orientasaun ne’ebé treinadór orienta ona.

“Ami manán tanba sorti, tanba ekipa rua ne’e forsa hanesan maibé ami-nia sorti maka liu, mais jogu lakon ka manán importante labele kria problema ho ekipa seluk,” nia orgullu.

Entretantu, jogu ho durasaun menutu 90 iha 4 finál ne’e, lidera hosi árbitru Octaviano da Cruz, asistente árbitru Maria Coel, asistente line ba dahuluk Joaquim Mota Beneditu da Conceição, asistente line ba daruak Gerson Pereira.

Jornalista            : Abílio Elo Nini
Editór                  : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here