Conselho de Imprensa atribui karteira profesional ba jornalista sira iha Bobonaro. Imajen CI.

BOBONARO, 25 novembru 2021 (TATOLI) – Konsellu Imprensa (CI sigla portugés) kuarta ne’e atribui karteira profisionál ba jornalista na’in-ualu iha munisípiu Bobonaro.

Jornalista na’in-ualu ne’e komposta hosi Rádiu Komunidade Maliana (RKM) na’in-hitu (mane rua no feto lima) no jornalista Rádiu Televizaun Timor-Leste, empreza publika (RTT,EP) destakadu na’in ida.

Prezidente CI, Virgílio da Silva Guterres ‘Lamukan’, hateten’ atribuisaun karteira profisionál nu’udar pasu importante rekoñese no akredita jornalista sira.

“Ne’e hanesan misaun no kompeténsia Konsellu Imprensa nian, atribui karteira profisionál ba jornalista sira tanba haree katak jornalista sira-ne’e prienxe ona kritéria katak iha artigu balu fó izensaun ba jornalista sira bainhira Lei Komunikasaun Sosiál la’o, sira hahú ona profisaun tinan-lima ba leten, entaun sira iha direitu tomak atu hetan,” nia ko’alia iha eskritóriu Rádiu Komunidade Maliana.

Entretantu membru Konsellu Imprensa, Konselleiru Benevides Correia Barros, enkoraja jornalista sira atu uza karteira profisionál ne’e tuir Lei Komunikasaun sosiál, katak hakru’uk no respeita nafatin Kódigu Étika.

“Imi simu ona karteira profisionál, ne’e responsablidade ida-ne’ebé todan tebes. Todan iha sentidu rua, primeiru oinsá mak ita bele fó informasaun ne’ebé kualidade, segundu oinsá mak informasaun ne’ebé ita fó ba ne’e reprezenta komunidade ka ema-ne’ebé ezije atu ko’alia ho klaru,” konselleiru ne’e fó hanoin.

Biban ne’e, Jestór Programa Rádiu Komunidade Maliana, Juaquina Seixas, orgullu no agradese ba CI tanba atribui direita karteira profisionál iha baze.

“Liuhosi karteira profisionál ida-ne’e motiva liután ami atu sai profisionál hodi serbí públiku ho informasaun ne’ebé kualidade,” nia akresenta.

Tuir dadus ne’ebé iha, KI konsege atribui ona karteira profisionál ba jornalista sira iha territóriu nasionál 300-resin maibe na’in 150-resin depozita fali ba KI tanba muda ona serbisu ba funsionáriu públiku.

Jornalista         : Sérgio da Cruz

Editór               : Evaristo soares Martins

PUBLISIDADEiklan

HAKEREK NO HATÁN

Please enter your comment!
Please enter your name here