Sekretáriu Autoridade Munisípiu Bobonaro, Júlio Carvalho Caero. Imajen Tatoli/Sérgio da Cruz.

BOBONARO, 24 novembru 2021 (TATOLI) – Autoridade munisípiu Bobonaro, prioritize programa haat inklui Projetu Dezenvolvimentu Munisipál (PDIM) iha Orsamentu Jerál Estadu (OJE) tinan fiskál 2022.

Tuir livru 3B (Munisípiu) previstu despeza ba Autoridade Munisipál Bobonaro iha OJE 2021 ho montante millaun $4.4. Orsamentu hirak-ne’e aloka tuir liña orsamentu serbisu setorIál no sekretariadu autoridade munisipál nian. Hosi totál orsamentu akumula ona kustu ba merenda eskolár, alfabetizasaun, konsensaun eskolár millaun $1.6 no ba projetu reapropriasaun PDIM rihun $329.1.

Sekretáriu Autoridade Munisípiu Bobonaro, Júlio Carvalho Caero, hateten OJE 2022, hosi kapitál dezenvolvimentu sei foka  liu ba konstrui edifísiu foun hamutuk haat iha munisípiu ne’e.

“Ami foka liu ba atividade konstrusaun edifísiu postu administrativu rua, salaun enkontru administrasaun munisípal no armazein STAE Bobononaro nian,” nia informa ba jornalista sira iha suku Ritabou, Maliana, segunda ne’e.

Despeza jerál

Hosi montante orsamentu $ 4,426,163 ne’e koloka ba saláriu no vensimentu $ 1,589,910, bens (sasán) no servisu $ 887,113, kapitál dezenvolvimentu $ 329,175 no transferénsia públika $ 1,619,965.

Hosi montante ne’e koloka ba programa ho kódigu 026 kona-ba estradas no ponte $ 88,041, programa kódigu 028 kona-ba dezenvolvimentu rurál no urbanu ne’ebé prevee iha kapitál dezenvolvimentu sei gasta $ 329,175, programa ho kódigu 366 kona-ba seguransa nasionál $32,500, programa ho kódigu 392 kona-ba asesu ba justisa $ 30,716, programa ho kódigu 510 kona-ba boa governasaun no jestaun institusionál $1,803,052.

Nune’e mós programa ho kódigu 797 kona-ba agrikultura sei gasta $ 445,641, programa ho kódigu 798 kona-ba água no saneamentu $ 146,968, programa ho kódigu 805 kona-ba saúde $ 188,446, programa ho kódigu 979 kona-ba edukasaun no formasaun $ 1,265,852, programa ho kódigu 980 kona-ba igualdade jéneru no inkluzaun sosiál $ 85,632 no programa ho kódigu 982 kona-ba urismu sei gasta10,140.

Kapitál dezenvolvimentu-PDIM 

Programa PDIM ba Autoridade Munisipál Bobonaro iha OJE 2022/imajen espesiál.

Programa PDIM ba Autoridade Munisipál Bobonaro hetan alokasaun orsamentu husi Orsamentu Jeral Estadu 2022 hamutuk rihun $571.2 hodi kontinua implementa projetu reapropriasaun 14.

Ezekusaun OJE 2021

 

Enkuantu dadaun ne’e, autoridade munisipál Bobonaro ezekuta Orsamentu Jerál Estadu tinan 2021 atinje ona 50% hosi montante $5.002,757.

“Ida 50% ne’e ami ko’alia halai liu kona-ba saláriu no vensimentu, bens (sasán) no servisu tanba kapitál dezenvolvimentu tinan ne’e ami laiha alokasaun orsamentu, só transferénsia públika mak iha-ne’e halai liu ba insentivu suku no pesoál suku sira no ami iha prosesu aprovizionamentu ba kapitál minór mak atrazu oituan, tanba sei loke konkursu no avaliasaun ne’e mak impede ezekusaun,” nia dehan.

Bazea ba Livru 3-B (Munisípiu) ne’ebe Agência Tatoli asesu, konstrusaun projetu foun haat ne’e Autoridade Bobonaro prioritiza kedas iha OJE 2021 nian no kontinua reapropria ba OJE 2022.

Totál orsamentu ne’e prevee iha OJE 2021 ba konstrusaun edifísiu postu aministrativu Bobonaro ho montante $166.000, edifísiu postu administrativu Maliana $171.000, konstrusaun edifísiu akomoda serbisu delegasaun teritoriál $121.125 no konstrusaun armazein STAE Bobonaro $90.500.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here