Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, kuarta (24/11). Imajen TATOLI/Francisco Sony

DILI, 24 novembru 2021 (TATOLI)–Governu liuhosi reuniaun Konsellu Ministru (KM) analiza ba pontu situasaun epidemiolójika nasionál ne’ebé aprezenta hosi koordenadór sira hosi Sala Situasaun Sentru Integradu Jestaun Krize nian (CIGC, sigla portugés), hodi deside la renova Estadu Emerjénsia (EE).

Ministru Prezidénsia Konsellu Ministru, Fidelis Manuel Leite Magalhães, hateten, inisiativa ne’e tanba haree ba promulgasaun alterasaun dahuluk Lei númeru 10/2004, Lei Sistema Saúde.

“Governu deside la propoin renovasaun Estadu Emerjénsia ne’ebé sei termina iha loron 28 novembru tuir mai, maibé aprova Projetu Dekretu-Lei kona-ba medida esesionál no temporária vijilánsia sanitária ba resposta pandemia COVID-19,” Ministru relata hafoin reuniaun ezekutivu, iha Palásiu Governu, kuarta ne’e.

Notísia relevante: PR promulga alterasaun Lei Sistema Saúde, Estadu la prezisa implementa EE

Portavóz Governu dehan, medida vijente no diploma mantein, maibé parte halo alterasaun, ne’ebé bainhira tama mai territóriu nasionál la presiza hetan autorizasaun hosi Primeiru-Ministru, maibé tenke sujeita nafatin ba kontrolu sanitáriu no hatudu rezultadu negativu ba teste COVID-19.

Enkuantu, lisensa, autoridade no aktu administrativu seluk hosi dokumentu mantein válidu to’o loron 31 janeiru 2021, ne’ebé prazu la fixa tuir akordu internasionál no la tuir lei ne’ebé Parlamentu Nasionál aprova tuir rezerva kompeténsia absoluta.

“Nafatin halo izolamentu profilátiku obrigatóriu iha termu sira ne’ebé define antes ona,” governante ne’e akresenta.

Biban ne’e, Governu agradese ba esforsu no servisu hosi CIGC, profisionál saúde, órgaun soberania, no ema hotu, ne’ebé la kolen ba luta difísil kontra COVID-19.

“Ita la extende ona EE tanba situasaun komesa di’ak daudaun, maibé risku ba moras ne’e sei iha nafatin, tanba ne’e kontinua husu ba públiku atu kuidadu nafatin bainhira halo atividade karik kontinua nafatin aplika medida prevensaun sira,” governante ne’e fó hanoin.

Jornalista : Antónia Gusmão

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here