Jogadór prinsipál hosi klube futsal Becusse United FC Venseslau Guterres (7) “Abay” sai hanesan mellor markadór iha Pra Liga Futsal Timor-Leste. Imajen/LFTL

DILI, 23 novembru 2021 (TATOLI)– Jogadór prinsipál hosi klube futsal Becusse United FC, Venceslau Guterres (7) “Abay” sai hanesan mellor markadór, hahú  hosi jornada dahuluk to’o 23 konsege hatama golu 50, iha Pra Liga Futsal Timor-Leste 2020-2021, ne’ebé organiza hosi Assosiasaun Futsal Timor-Leste (AFTL).  

Alende ne’e, Jogadór ne’ebe  okupa númeru daruak, mak Ruben Faria ho golu 36 hosi klube Mauputar FC,  terseiru lugar, Benedido de Ramos ho golu hamutuk 33 hosi klube Bermeta FC, tuir fali Fransico Pereira hatama golu 33 hosi Gamer FC, okupa númeru dahaat Samuel dos Reis ho golu 23 hosi klube Kuda Ulun FC, dalimak okupa hosi Salvadór Saldaña  ho golu 22 hosi klube Boa Sorte FC no Leonildo Tores  ho golu 22 hosi klube Caesardante FC.

“Ha’u sente kontente sai hanesan mellor markadór iha Pra Liga Futsal ne’e. Ha’u agradese ba ami nia ekipa tanba ami nia serbisu hamutuk mak ohin loron ha’u sai mellor markadór,” Jogadór Abay hateten ba Agência TATOLI iha Estádiu Dili, tersa loraik ne’e.

Nia dehan, ba oin Becusse United sei kompete iha liga futsal iha primeira divizaun no nia nafatin hatudu performe ne’ebé di’ak hodi hametin titulu ne’ebé  hetan ona.

Jogu ikus iha pra Liga futsal hala’o iha sesta (26/11), Ramelau FC  kontra  Boa Sorte FC no pozitivu ona ba Ramelau sai hanesan kampiaun ba Pra Liga Futsal Timor-Leste ho pontu 61 tanba Boa Sorte iha de’it pontu 43.

Hosi jogu pra liga futsal ne’e klube 10 mak utrapasa ba primeira divizaun Ramelau FC, Mushila FC, Boa Sorte FC, Becusse United, Mauputar FC, São Francisco Xavier, Caesardante FC, AD Samoro, Gamer FC no Jerman FC.

Enkuantu, klube sira ne’ebé mantein iha segunda divizaun mak, Coelho FC, Bermeta FC, Maudoko FC, Santa Cruz FC, VDL Lahane, Boavista FC, Kuda Ulun FC, Crazy Horse, FIEL FC, Estrela Baguia, Baucau All Star, B’TAL FC, Kablaki FC no Academica FC.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here