Jogador AD.SLB halo selebrsaun hafoin hatama golu ba guarda rede DIT FC iha jogu Primeiru Divizaun LFTL, iha Estádiu Munisipál Dili, tersa 23/11/2021. Imajen Tatoli/Antonio Goncalves

DILI, 23 novembru 2021 (TATOLI)– Ekipa Makikit Laulara alias AD SLB susesu iha nia jornada hodi halakon nia adversáriu DIT FC rezultadu skore 4-1, iha jogu kontinuasaun Liga Futeból Timor-Leste (LFTL) ne’ebé hala’o iha Estádiu Munisipál Dili, tersa loraik ne’e.

Hosi vitória ne’ebé SLB hetan lori ekipa ne’e haksoit kedan ba okupa pozisaun daruak iha tabela klasifikasaun provizóriu ho pontu haat, hodi  tuir kedan Karketu Dili FC ne’ebe lidera pozisaun dahuluk ho pontu neen.

Enkuantu, ekipa seluk hanesan Lalenok United FC okupa terseiru lugar ho pontu tolu, Ponta Leste ho pontu tolu hanesan, maibé diferente bola, Aitana FC hela iha kintu lugar ho pontu ida no Assalam ho DIT mantein ho zero.

Jogador AD.SLB (farda mean) esforsu hodi hadau malu bola ho jogador DIT FC iha jogu Primeiru Divizaun LFTL, iha Estádiu Munisipál Dili, tersa 23/11/2021. Imajen Tatoli/Antonio Goncalves

Hanesan baibain jogu hahú ekipa rua lansa kedan kontra no atake ba malu ho ritmu ne’ebé as liuhosi duir bola hosi ain ba ain atu buka hatama golu, maibe iha tuku 16:00 otl, akontese udan boot hodi habokon jogadór na’in-22, maibé la hamate espíritu ekipa rua ne’e.

Udan ne’e halo jogadór DIT maioria la kontrola bola ho di’ak, nune’e iha minutu hitu jogadór, SLB Alexandro Kefi (21) lansa kedan golu hodi muda eskore 1-0.

Nune’e mós, jogu foin la’o de’it minutu balun, jogadór DIT liuhosi defeza la kontrola bola ho di’ak fó kedan oportunidade ba jogadór SLB, Jermeas Baptista (69) lansa tan golu ida muda rezultadu ba 2-0.

Ho golu rua ne’e halo jogadór DIT komesa ho emosaun hodi la joga ho másimu. SLB kontinua esforsu atu hatama golu, maibé la konsege tanba DIT nia defeza muda estratéjia no halo avansadu SLB labele book an.

Hakuur ba minutu 45+, jogadór SLB Alexandro (21) konsege uza nia individuál hodi hala’o jogu bonitu iha liña oin no aproveita oportunidade fura duni rede DIT hodi muda eskore ba 3-0. Golu ne’e mak  ikus iha jogu primeira parte.

Jogador AD.SLB halo selebrsaun hafoin hatama golu ba guarda rede DIT FC iha jogu Primeiru Divizaun LFTL, iha Estádiu Munisipál Dili, tersa 23/11/2021. Imajen Tatoli/Antonio Goncalves

Dolar ba segunda parte ekipa rua nafatin hatudu jogu agresivu, maibé jogu ladun la’o ho velosidade ne’ebé makas tanba kampu laran nakonu udan been.

Iha minutu 89 sorte monu ba jogadór Jermeas (69) hodi lees tan rede DIT hodi muda rezultadu ba 4-0.  Golu ne’ebé SLB halo la hamate esperansa DIT, nune’e iha minutu 87, jogadór DIT José Santos (7) konsege hatama golu ida hodi muda eskora 4-1. 

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here