CNE realiza edukasaun sivika ba prizioneiru sira iha prizaun Covalima. Imajen Tatoli/Celestina Teles.

COVALIMA, 23 novembru 2021 (TATOLI)—Komisaun Nasionál Eleisaun (CNE, siglá portugés) Covalima hahú hala’o programa edukasaun sivika ba eleitór sira liu-liu ba dadur sira iha prizaun Covalima.

Programa edukasaun sivika ho tema “Promove Esklaresimentu kona-ba Aktu Eleitoràl Ne’ebé Reziliente ho COVID-19” iha ámbitu preparasaun ba eleisaun prezidensiál ne’ebé sei realiza iha fulan-marsu tinan 2022.

Administradór postu administrativu Suai Vila, Luzinho do Rego, hateten programa eduksaun sivika ba eleitór liu-liu ba prizioneiru sira iha prizaun laran ne’e importante tebes.

“Ha’u hanoin CNE nia programa ne’e, Governu konsidera ema hotu iha direitu ne’ebè mak hanesan atu asesu ba kualker informasaun kona-ba polítiku no seluk tan, no ema hotu iha direitu hanesan,” Administradór Luzinho do Rego, hateten liuhosi nia diskursu bainhira halo abertura  ba programa edukasaun sivika ne’ebé CNE hala’o ba daduur sira iha prizaun Covalima, tersa ne’e.

Programa eduksaun sivika ne’e, CNE hakarak garante ba sidadaun sira iha prizaun nomós iha direitu hanesan ho sidadaun sira seluk atu tuir eleisaun hodi ezerse sira-nia direitu votu.

Programa refere nafatin atu promove prosesu eleitorál ida-ne’ebè mak nafatin iha integridade no imparsialidade ho situasaun COVID-19.

“Ita hotu tenke tau atensaun másimu informasaun hirak ne’ebé mak sei hato’o hosi diretór CNE Covalima ho nia ekipa. Ita hotu ezerse ita-nia direitu hanesan sidadaun atu deside ita-nia votu ba Prezidente no partidu politiku ida atu lidera durante tinan lima tenke hatene sira-nia programa no polítika,” nia hateten.

Diretòr CNE munisípiu Covalima, Hermenegildo de Sena esplika, CNE realiza eduksaun sivika iha ámbitu atu prepara hodi hasoru eleisaun prezidensiál ne’ebé sek realiza iha tinan oin.

“Ami realiza edukasaun sivika relasiona ho preparasaun hodi hasoru eleisaun prezidensiál. Ho ida-ne’e katak CNE sei la diskrimina sidadaun sira,” nia hateten.

CNE iha obrigasaun atu halao edukasaun sivika ba sidadaun sira kona-ba sira-nia knar ne’ebé sei hala’o supervizaun iha eleisaun.

Segundu Komandante PNTL Eskuadra Suai, Primeriu Sarjentu João Alves, hateten parte seguransa prontu atu fó seguransa ba atividade hosi CNE, ne’ebé realiza edukasaun sivika ba sidadaun sira no ba eleisaun.

“Edukasaun sivika importante ba ita ema. Iha oportunidade ida-ne’e, apresia tebes inisiativa hosi CNE hodi fahe informasaun ba ita-nia tiu, maun-alin sira iha prizaun Covalima,” nia dehan.

Tanba, nia dehan, parte seguransa iha nia planu bainhira realiza eleisaun prezidensiál, parte seguransa sempre fó nafatin asisténsia seguransa másimu iha kualker atividade ne’ebè mosu iha territóriu nasional.

Diretòr Prizaun Covalima, Julio Dias Ximenes, hateten edukasaun sivika importante ba sidadaun hotu atu hatene kona-ba lala’ok eleisaun nian.

“Edukasaun sivika ne’e, loos duni, importante ba ita hotu.  Tanba nu’udar sidadaun iha direitu atu hili. Edukasaun sivika hanesan sensibilizasaun ida ba sidadaun sira hodi prepara ba eleisaun prezidensiál 2022,” nia dehan.

Bazea ba dadus ne’ebé fó sai hosi Diretòr Prizaun Covalima haktuir katak prizioneiru hamutuk 110 mak hela iha prizaun, no hosi númeru ne’e prezu kondenadu 71 no prezu preventivu 39.

Tuir observasaun Agência Tatoli nota katak, CNE realiza programa edukasaun sivika iha prizaun Covalima ne’e hetan partisipasaun màsimu hosi prizioneiru sira-ne’ebé mak hosi bloku A to’o C.

Jornalsita : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here