Prezidente KAEES, Maria Filomena Lay Guterres. Imajen/média UNTL.

DILI, 22 novembru 2021 (TATOLI)–Komisaun Asesu Engeresu Ensinu Superior hahú loke ona prosesu inskrisaun rejime espesiál ba estudante iha territóriu Nasionál inklui Rejiaun Administrativu Espesiál Oé-Cusse Ambeno (RAEOA) atu tama ba Universidade Nasionál Timor-Lorosa’e (UNTL) no Institutu Politékniku Betanu (IPB).

“Prosesu Inskrisaun ba rejime espesiál ne’ebé loke ba Munisípiu 12 inklui REAOA ne’e, sei to’o de’it loron 10. Inskrisaun ne’e sei hahú ohin 22 novembru to’o loron 03 dezembru 2021. Hafoin ramaa, ekipa sei fila-fali hodi halo preparasaun ba elaborasaun pontu ezame no sei realiza ezame ba kandidatu sira iha loron 22–23 dezembru 2021 ba rejime espesiál,’ Prezidente Komisaun Asesu Engeresu Ensinu Superiór (KAEES), Maria Filomena Lay, hateten ba Agência Tatoli iha nia knar fatin Colmera, Dili, segunda ne’e.

Nia husu ba joven sira iha territóriu nasionál ne’ebé iha interrese hakarak eskola iha instituisaun públiku hanesan UNTL no IPB, bele hakbesik an ba dirasaun edukasaun munisípál iha territóriu nasionál inklui RAEOA atu haree kriteru sira hodi bele halo inskrisaun.

“Ita kontinua loke oportunidade ba rejime rua mak hanesan rejime espesiál no rejime jerál. Ba rejime jerál, ita sei hein rezultadu hosi Ministériu Edukasaun ne’ebé sei fó sai rezultadu iha janeiru 2022, bazea ba selesaun no númeru vaga ne’ebé instituisaun sira sei haruka mai ita,” nia dehan.

Diretora Filomena Lay katak bazeia ba diploma ministeriál ba asesu engeresu 2022 finalista sira hanesan veteranu nia oan no rejime hakbiit ba kbiit laek nia oan sira kontinua hetan oportunidade atu tuir nafatin tanba joven sira ne’e balun mós finalista.

Maibé tenke iha deklarasaun hosi eskola kona bá sira nia partisipasaun iha prosesu ensinu aprendizajen atu nune’e Ministériu Ensinu Superiór bele hatene katak sira akaba duni ensinu sekundáriu.

Tanba polítika governu nian maka kada tina sempre loke oportunidade ba joven sira atu hetan fatin bele asesu iha Instituisaun ensinu superiór públiku rua ne’e hodi bele hamenus todan ne’ebé família sira enfrenta. Entretantu vaga ba tinan ida ne’e seidauk fiksu tanba estudante sira asesu ba rejime sira ne’e mós barak seidauk kontinua eskola.

“Sira barak mak kompleta tiha prosesu administrasaun maibé seidauk marka prezensa to’o ohin loron, barak mak foin komesa fali sira-nia semestre. Ne’e hanesan dezafiu balun ne’ebé ita bele halo asesu engeresu kualidade to’o ne’ebé maibé situasaun mundiál kona-ba ensinu aprendizajen mós sei afeta ba kualidade,” nia dehan.

Enkuantu Diretór Servisu Edukasaun Munisípiu Vikeke Emídio Amaral akresenta katak ekipa KAEES realiza ona inskrisaun ba estudante sira iha Viqueque, maibé nia seidauk hatene totál estudante hira mak halo ona inskrisaun tanba prosesu sei to’o loron 10.

Jornalista : Tomé Amado

Editora      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here