Prezidente IPG , Gaby Aparicio, asinatura Nota Intendementu (MoU) Prezidente Konsellu Administrasaun ANAS, I.P, Domingos Pinto kona-ba peskiza quantidade be’e iha rai okos. iha timor plaza (22/11). Imajen Tatoli/Egas Cristóvão

DILI, 22 novembru 2021 (TATOLI)- Institutu Petróleu no Jeolójia, Institutu Públiku (IPG,I.P) no Autoridade Nasionál Serbisu Água no Saneamentu, Intitutu Publiku (ANAS, I.P), selebra akordu hala’o kooperasaun serbisu hamutuk halo estudu ba rekursu bee  iha rai okos.

“Objetivu hosi akordu entre IPG, I.P no ANAS, I.P atu serbisu hamutuk halo estudu no rekursu hidro-supteranu ninian kuantidade no distribuisaun, nune’e bele oferese bee kualidade di’ak ba komunidade.  Tanba IPG, I.P nu’udar peskizadór no ANAS, I.P nu’udar reguladór,” Prezidente IPG,I.P, Gabriel Gaspar Aparício de Oliveira, hateten iha Suai Room, Timor-Plaza Dili. 

IPG hala’o estudu sira atu fornese dadus ba ANAS,I.P hodi regula tanba sira mak bele jere bee moos ba komunidade.

Nune’e, akordu ho durasaun ba tinan-rua, hahú 22 novembru 2021 to’o 22 novembru 2023, ho akordu tékniku funsaun operasionál no responsabilidade IPG nian atu halo iha akordu ne’e hamutuk ualu (8).

Resposabilidade dahuluk, aloka traballadór ne’ebé presiza no fundu atu hala’o estudu no investigasaun hindro-jeolójiku, jeolójika, perfurasaun bee, konstrusaun posu no teste bomba.

Daruak, aloka númeru traballu ne’ebé presiza no rekursu sira seluk atu prodús mapa forma alternativu sira seluk karik presiza. No datoluk, mak promove peskiza sientífiku iha hidrolójia, ho konsiderasaun katak estudu jeofíziku inklui avaliasaun ba kualidade ba bee rai okos iha área estudu kona-ba efetu ba mudansa kualidade no kuantidade bee.

Dahaat, mantein diseminasaun informasaun ba área ida-idak ne’ebé propoin hosi ANAS,I.P atu garante abastamentu bee iha rai-okos ne’ebé sustentável ba Bee Timor-Leste, Empreza Públiku (BTL,E.P) inklui mós entidade abastamentu bee sira seluk.

Nune’e, mós ba dalimak, hatudu pontu fokál-nivél tékniku atu hasoru malu pesoalmente ho reprezentante ANAS,I.P liuhosi email ka telemóvel, semana ida dala ida, atu troka informasaun kona-ba progresu hosi prosesu projetu  estudu iha bee rai-okos nian.

Daneen, fó asiténsia tékniku ba ekipa ANAS,I.P bainhira de’it husu.  No dahitu, fornese arkivu no dadus nesesáriu hosi ANAS, I.P ba peskiza bee rai-okos nian ba ninian jestaun sustentável no integradu. Enkuantu, ikus liu, IPG sei informa ba ANAS, molok hahú atividade estudu sira.

Iha tinan kotuk, IPG foku makaas ba estudu bee rai-okos iha munisípiu sira hanesan, Manatuto iha Kribas, Dili, Covalima, Laga, Baguia, Lautém, ne’ebé iha hela faze estudu.

“Ita-nia peskiza ne’e deskobre bee-moos, iha Dili agora ita faze perfurasaun hanesan iha Camea, nune’e ba oin ita haree iha suku Matai-Suai no Mehara-Lautém, Laga-Baucau ne’ebé bele halo distribuisaun bee hodi fó ba ANAS, I.P mak jere,” Prezidente ne’e akresenta.

Iha biban hanesan, Prezidente ANAS, I.P, Domingos Pinto, hateten, akordu ninia benefísiu boot tebes ba ANAS,I.P tanba hanesan autoridade ba água no saneamentu.

Akordu tékniku, nia dehan baze atu kolabora ho IPG, I.P hodi halo investigasaun ba rekursu bee rai-okos ne’ebé bele ajuda parte relevante sira atu foti desizaun hodi halo esplorasaun ba atividade bee rai-okos. 

“Akordu ne’e atu identifika rekursu bee rai-okos ne’ebé hodi hatán ba ezijénsia hosi departamentu relevante sira Governu nian ne’ebé iha nesesidade atu hatán ho forma sustentavel, ne’ebé bele sai ponte ligasaun ba nesesidade bee loron-loron povu nian tanba limitasaun abastamentu,” Prezidente ne’e akresenta.

IPG hala’o estudu bee iha rai-okos, hafoin fornese rezultadu estudu kona-ba armazenamentu potensiál bee rai-okos ba ANAS, I.P nu’udar responsavel atu jere no fahe rekursu bee sira ho forma sustentavél no integradu.

Iha akordu tékniku ne’e funsaun no responsabilidade hosi ANAS, I.P hamutuk hitu hanesan planu espesífiku saida de’it ba esplorasaun bee rai-okos ne’ebé presiza investimentu kle’an liu kona-ba ideolójia ka estudu hosi IPG  

“Atu uza rekursu bee refere iha future ba posu sira ne’ebé IPG,I.P instala ona, ANAS iha responsabilidade atu zere didi’ak monitorizasaun ka entrega ba entidade seluk direitu atu halo estrasaun bee ho di’ak,” nia akresenta.

Aloka númeru traballadór ne’ebé presiza hodi tulun prosesu konstrusaun posu ho di’ak iha kualkér área iha Timor-Leste no fahe dadus ne’ebé presiza ba dezevolvimentu serbisu peskiza nomós iha rezultadu finál.

“Responsável ba teste kualidade bee nian hosi kualkel projetu peskiza konjunta bee rai-okos haktuir padraun Organizasaun Mundiál Saúde (OMS) nian no fornese dokumentu no dadus nesesária ne’ebé presiza hosi IPG,” nia akresenta.

Jornalista : Arminda Fonseca

Editór        :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here