Ministériu Koordenadór Asuntu Ekonómia (MKAE), Sekertáriu Estadu Formasaun Profisionál no Empregu (SEFOPE) no Institutu Dezenvolvimentu Mão-de-obra (INDMO) hamutuk ho parseiru internasionál sira halo lansamentu Kompetisaun Nasionál Aptidaun 2021 Virtuál. Iha salaun Sentru Formasaun Polísia Comoro Dili, segunda (22/11). Imajen Tatoli/Francisco Sony

DILI, 22 novembru 2021 (TATOLI)—Diretora Instituto Nasionál Dezenvolvimentu Mão-de-Obra (INDMO), Isabel Fernandes de Lima, afirma, hateten Governu Timor-Leste liuhosi INDMO no parseiru dezenvolvimentu nia garantia Timor-Leste estabelese ona sistema formasaun profisionál ne’ebé mak forte no garante iha kualidade hodi responde ba nesesidade no demanda merkadu traballu iha rai laran no mós rai-li’ur.

Diretora ne’e hateten, iha tinan 2021 ne’e INDMO halo kooperasaun ho Ministériu Koordenadór Asuntu Ekonómiku (MKAE) no Sekretária Estadu Formasaun Profisionál no Empregu (SEFOPE) kontinua iha kompromisu hala’o konkursu nasionál ba aptidaun ba dahitu liuhosi virtual ka online

Diretora Institutu Nasionál Dezenvolvimentu Mão-de-obra (INDMO), Isabel Fernandes de Lima. Imajen TATOLI/Francisco Sony.

“Liuhosi planu anuál, INDMO Timor-Leste hanesan mós komisaun organizadora konsege organiza ona konkursu nasionál ba aptidaun daneen iha tinan 2020 hafoin hahú iha fulan-outubru 2014, konsidera hanesan pilotu atu aprende oinsá implementa konkursu refere ho di’ak no efetivu. Ba tinan 2021, INDMO halo kooperasaun di’ak liután ho MKAE no SEFOPE kontinua iha kompromisu atu hala’o konkursu nasionál ba aptidaun ba dahitu ho maneira virtual ka online,” Isabel Fernande de Lima hateten iha ámbitu abertura kompetisaun nasionál ne’ebé hala’o iha salaun Sentru Formasaun Polísia, Comoro, segunda ne’e.

Ba implementasaun konkursu ida-ne’e hetan orsamentu hosi Orsamentu Jerál Estadu (OJE) ne’ebé mak INDMO rasik propoin hanesan orsamentu anuál ba atividade INDMO nian.

Konkursu ida-ne’e sei fó oportunidade ba foinsa’e sira ho idade 18 to’o 25 hosi sentru formasaun Ensinu Sekundária Tékniku Vokasionál (ESTV) atu halo konkursu hasoru padraun nasionál iha área konstrusaun sivil hanesan, pedreira, soldadura, kanalizasaun, karpentaria no eletrisídade.

“Konkursu nasionál ba aptidaun virtuál ho objetivu jerál mak atu prepara Timor-Leste ba konkursu abilidade rejionál no mundiál, atu armoniza kualifikasaun nasionál Timor-Leste nian ho ASEAN no mundiál,” nia haktuir.

Alende ne’e, atu hasa’e kompriensaun reprezentante hosi Governu no indústria sira kona-ba importánsia hosi edukasaun vokasionál no fomasaun profisionál, atu hasa’e konsiénsia foin-sa’e sira nian no hirak ne’ebé influénsia sira ba oportunidade iha abilidade prosionál.

Nune’e mós, atu hasa’e oferta ba empreza sira, indústria no area servisu, no oportunidade atu hasoru no rekruta ema hirak ne’ebé iha abilidade no hatudu ona exelénsia iha sira-nia área abilidade.

Objetivu espesífiku mak atu teste kualidade no integridade hosi estrutura kualifikasaun nasionál Timor-Leste nian ne’ebé estabelese tiha ona, atu fornese oportunidade ba sentru formasaun akreditadu no ESTV sira atu demonstra sira-nia abilidade iha area konstrusaun sivil nian.

Aleinde ne’e, ho objetivu atu promove partisipasaun foinsa’e feto Timor-Leste iha área servisu konstrusaun nian, no fó oportunidade ba sentru formasaun akreditadu no ESTV sira atu kompete hasoru padraun industriál nasionál, rejionál no internasionál.

Sentru formasaun ne’ebé sai kompetitór ba iha loron 22-26 novembru 2021 kompostu hosi sentru formasaun, CNEFP Tibar, CNFP Bekora, Sentru treinamentu Dom Bosco Comoro, Sentru formasaun Ir. Carlos Gamba Kairiri, Gariuai, Baucau no CTC.

“Ba konkorente sira, manan ka lakon la’ós rohan ba esforsu sira, no dedikasaun ne’ebé hatudu ona durante tempu formasaun nian,” Diretora ne’e fó hanoin.

Ministru Koordenadór ba Asuntu Ekonómiku (MKAE), Joaquim Amaral. Imajen Tatoli/Francisco Sony

Ministru Koordenadór Asuntu Ekonómiku (MKAE), Joaquim Amaral, konsidera eventu ne’e importante loos hafoin Estadu Timor-Leste hakat liu krize sanitáriu introdús medida restrinzimentu ne’ebé tau iha serka sanitária no konfinamentu obrigatóriu kauza hosi COVID-19 ne’ebé atividade ekonómiku, formasaun no ensinu sira.

“Eventu ne’e hatudu mai ita sinál forte tebe-tebes ba atividade merkadu atu komersa normaliza daudaun ona. Konkursu ne’e nu’udar atividade normál INDMO hanesan orgaun reguladora organiza hodi hatán nesesidade merkadu no demanda merkadu,” Ministru Joaquim hateten.

Governante ne’e fiar katak, eventu ne’e la’ós de’it kompetisaun maibé hanesan fórum no oportunidade ida ba foinsa’e sira-ne’ebé mak partisipa ona iha formasaun profisionál no hala’o ona sira-nia esperiénsia iha servisu iha indústria atu hatudu sira-nia kapasidade iha indústria tuir padraun nasionál ne’ebé INDMO aplika.

Kompetisaun ne’e mós sei tulun INDMO atu bele selesiona kompetitór sira atua aban-bainrua iha oportunidade tuir konkursu iha nivel aas liu.

Biban ne’e, INDMO mós entrega sertifikasaun apresiasaun ba Chef  Timor-oan na’in-rua ne’ebé hala’o kna’ar ho susesu iha Expo Dubai tinan 2021, sira-na’in-rua selesionadu hosi INDOMO hodi prepara hahan ho sabor Timór iha Expo Dubai, no lansa mós website INDMO nian www.indmo.co.tl.

Instituto Nasionál Dezenvolvimentu Mão-de-Obra (INDMO), nu’udar ajénsia Estadu nian, INDMO Timor-Leste harii tuir Dekretu-Lei númeru 8/2008, ho objetivu atu dezenvolve polítika formasaun profisionál.

Alende ezerse funsaun sira husi kriasaun lei, implementa funsaun avaliasaun, permite lisensiamentu operasionál no akredisaun ba sentru formasaun profisionál ho nivel formasaun tuir dekretu-lei númeru 36/2011 kona-ba sistema nasionál kualifikasaun.

Jornalista : Antónia Gusmão  

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here