Monumentu saudozu Joaquim ‘Mau Lahe’ iha suku Kolimau, postu adminístrativu Bobonaro, munísipiu Bobonaro. Imajen/Espesiál.

BOBONARO, 21 novembru 2021 (TATOLI)—Governu liuhosi Ministru Asuntu Kombatente Libertasaun Nasionál (MAKLN), Julio Saramento da Costa ‘Meta Mali’, sábadu (20/11) ne’e inaugura saudozu Joaquim ‘Mau Lahe’ nia monumentu iha suku Kolimau, postu adminístrativu Bobonaro, munísipiu Bobonaro.

Iha intervensaun, Julio Sarmento da Costa ‘Meta Mali, lori VIII Governu Konstituisionál nia naran apresia ba familia tanba iha inisiativa harii ona monumentu ne’ebé Eestadu ka Governu seidauk hanoin atu konstrui.

“Ha’u-nia prezensa mai iha ne’e atu hatudu de’it katak bainhira ita asina buat ruma Estadu ka Governu rekoñese duni. Ha’u atu dehan de’it ba imi katak imi gasta imi-nia osan harii monument, prezensa ministru nian mós fó valór ba imi,” nia dehan.

Konstrusaun ba Monumentu ne’e Governu liuhosi MKLN apoia fundu ho totál $3.500 hodi responde ba pedidu família saudozu Mau Lahe nian. Aleinde ne’e, hetan apoia mós hosi entidade relevante munisípiu Bobonaro, familia ho totál gastu $35,000.00 no monumentu ne’e konstrui tanba servisu hamutuk entre família, autoridade lokál no komunidade.

Minisru konsidera insiativa família saudozu Mau Lahe no komunidade suku Kolimau sai lisaun ida atu inspira família martires sira seluk iha territóriu laran tomak, atu aprezenta proposta ba Governu, tanba MKLN mós sei la taka matan atu apoia fundu tuir kbiit Governu nian.

“Imi nia proposta bele hatama maibé ha’u bele tulun imi mak ne’e $2000 ka $3000 de’it, no mak ha’u bele halo tanba osan atu sustenta imi -nia oan sira ba eskola, osan atu sustenta imi veteranu sira-nia moras, maibé ha’u foti no fó de’it mós ladi’ak, presiza imi-nia proposta,” nia dehan.

Prezidente Konsellu Kombatente munisípiu Bobonaro, Jaime Romano dos Santos ’Dotim’, louva família saudozu nian ne’ebe hola inisiativa harii monumentu hodi la hein hosi Governu.

“Ha’u rasik mós hanoin kona-ba ida-ne’e duni, maibé atu halo hanesan família saudozu Mau Lahe nia kbiit la to’o, tanba ita mós hein de’it ba Governu. Até ita preokupa kona-ba materiál hosi 1975 nian mós to’o agora ita seidauk haloot, ne’e duni imi-nia inisiativa ne’e furak tebe-tebes,” nia hateten.

Veteranu ne’e haklaken, konsellu kombatante iha planu tinan oin sei koordena ho família atu halo’ot restu mortál sira iha postu administrativu Bobonaro tau iha fatin dignu.

“Fatin iha tia ona Malilait Leten, ne’ebe nia sufisiente ba ema 400 resin. Se iha 2022, Governu nia pozisaun hanesan ne’e nafatin, ha’u sei fó hanoin ba ita tomak hola inisiativa ida soe netik osan ruma hola semente saka lima ou neen, depois ita halo de’it mak kaisaun hotu tia mak bolu ita nia na’i-ulun sira mai para inaugura, nune’e ita-nia saudozu sira bele tau sira iha fatin di’ak,” nia dehan.

Entertantu Xefe suku Kolimau, Armenio Soares, sente kontente ho ministru Julio Sarmentio da Cosa ‘Meta Mali’ nia prezensa, tanba maske iha loron feriadu bele rensponde ona sira-nia konvite hodi hakat to’o fatin inagurasaun ba momumentu ne’e.

“Ha’u fiar katak ho ministru nia espíritu boot haree ba saudozu nia simbolu ida-ne’e mak ohin loron ita bele prenxe ona minutu ida atu fó onra ba ita-nia saudozu,” nia dehan.

Biografia Saudozu Mau Lahe

Saudozu Joaquim Mau Lahe moris iha loron 16 fulan-jullu 1933, oan hosi aman Mau Lelo no inan Sose Mau. Saudozu nu’udar oan mane daruak hosi maun-alin na’in-lima (5) hanesan Loisura (matebian), Manuel (matebian), Bere Dasi (matebian) no Rogerio Ati Mau.

Imbolvimentu iha luta livertasaun nasionál

Iha tinan 1961 saudozu Mau Lahe involve iha forsa segunda liña hosi komapañia Cavalaria Bobonaro ne’ebe lidera hosi Kapitaun Alfredo, Alferis Manuel de Carvalho, sargentu Marsal no Kabu Nazario no sira seluk tán.

Iha altura ne’ebá, saudozu simu orientasaun hodi destaka ba postu segunda liña ne’ebe sirkula iha área fronteira hanesan Bobonaro parte Memo, Suai Fohorem, Tilomar no Fatumea, iha munisípiu Ainaro no Oé-Cusse.

Iha tempu Indonézia imvade Timor-Leste, soudozu mós inbolve iha baze de apoiu. Iha fulan-novembru tinan 1975, saudozu hetan fiar hosi komandante Manuel Soares, Manuel Barros, Agostinho Espirito Santo hodi asume kargu hansan komandante sesaun ba lidera funu hosi fronteira Batugade, Balibo, Maliana no rekua mai iha área Nunutana.

Iha loron 19 fulan-novembru tinan 1975, sai hosi Nunutana fila ba funu hasoru forsa Indonézia nian. Iha momentu ne’e, saudozu hamutuk soldadu sira mate iha área Galisapulu. Iha loron 18 fulan-dezembru 2015, komisaun eventuál CLN munisípiu Bobonaro no komisaun rekollamentu restu mortal, postu Bobonaro lori ba halo’ot iha ossoariu munisípiu Bobonaro.

Jornalista : Sérgio da Cruz

Editor       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here