Imajen mídia LFTL.

DILI, 20 novembru 2021 (TATOLI) – Jogu kontinuasaun Liga Futeból Timor – Leste (LFTL) sábadu ne’e entre ekipa primeira divizaun, AD SLB Laulara no Aitana FC fahe pontu iha jornada daruak tanba empate 0-0.

Iha primeira parte komesa ekipa rua lansa kedas kontra no atake tuir téknika no abilidade ekipa idak-idak nian ne’ebé orienta hosi treinadór sira.

Aitana iha ambisaun maka’as atu hatama golu nune’e bele fó vitória no xave metin pontu tolu iha tabela klasifikasaun. La’ós de’it Aitana mak esforsa maka’as maibé SLB halo jogu ho ofensiva hodi lansa kontra no atake ba Aitana maibé la rezulta golu ruma.

Aitana nia jogu tún maka’as iha menutu 20 tanba laiha jogadór médiu ne’ebé di’ak hodi pasa bola ba avansadu Edit Savio (9) no Fransyatma Kefi (21).

SLB hala’o jogu moris no domina bola iha kampu laran maibé falla iha avansadu tanba la halo ameasa ba guarda rede Aitana nian nune’e kontra atake hirak-ne’e hela de’it naran tanba la rezulta golu to’o primeira parte termina.

Tama ba segunda parte, ekipa rua nafatin hatudu sira-nia jogu ne’ebé di’ak maibé laiha mudansa ba tékniku no tátika atu marka golu tanba jogu la’o nunka diferente hanesan primeira parte.

Haree ba jogu ekipa rua ne’e nian laiha mudansa signifikativu hodi fó vitoria ba ekipa, nune’e to’o ikus rezultadu mak 0-0.

Ho rezultadu ne’e, fó biban ba Lalenok United kontinua lidera tabela klasifikasaun provizóriu ho pontu tolu, pozisaun segundu okupa hosi Karketu Dili FC no pozisaun terseiru okupa hosi AS Ponta Leste ho pontu tolu hanesan maibé diferente golu.

Nune’e mós SLB okupa iha pozisaun kuartu ho pontu ida, Aitana okupa iha pozisaun kintu ho pontu ida, enkuantu ekipa seluk hanesan, Assalam FC no DIT FC sei kontinua tuur iha zona-mean ho pontu zero.

Jornalista         : Hortencio Sanchez

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here