Diretór Rejionál Infraestrutura RAEOA, Candido dos Reis Amaral. Imajen TATOLI/Abílio Elo Nini.

OÉ-CUSSE, 20 novembru 2021 (TATOLI)– Autoridade Rejiaun Administrativa Espesiál Oé-Cusse Ambeno (RAEOA), aloka $4,2565,685.94 hosi Orsamentu Jerál Estadu (OJE) 2021 ba projetu manutensaun no reabilitasaun estrada rurál iha sub-rejiaun Pante Makassar, Oésilo, Pássabe no Nítibe.

Montante orsamentu millaun $4-resin ne’e ezekuta ba reabilitasaun estrada rurál sira kobre ba sub-rejiaun haat ne’e ho distánsia kilómetru 20, no manutensaun ba estrada rurál ho distánsia kilómetru 15, ne’ebé envolve empreza neen inklui serbisu emerjénsia ba jestaun inundasaun no moru ida.

“Ha’u hanoin ida-ne’e maka komunidade sira-nia hakarak no espetativa atu fasilita komunidade lori produtu ba iha merkadu, tantu tempu udan no bailoron naruk, nune’e mós fasilita transporte públiku no privada sira bele asesu ba fatin izoladu sira iha teritóriu Oé-Cusse,” Diretór Rejionál Infraestrutura RAEOA, Candido dos Reis Amaral, informa ba Agência Tatoli iha Oé-Cusse, sábadu ne’e.

Nia dehan, tenderizasaun públika ona no empreza neen (6) mak sai manan na’in, nune’e faze ezekusaun sei hahú iha tinan ne’e to’o tinan oin.

Entretantu, reabilitasaun estrada rurál iha sub-rejiaun Pante Makassar sei hahú hosi suku Bobakase, aldeia Bihala sa’e ba aldeia Kutete, suku Costa, ne’ebé ezekuta hosi empreza Lifau Indah Unipesoál, Lda, ho valór kontratu $2,623,959.80.

Reabilitasaun estrada rurál iha sub-rejiaun Oésilo, sei hahú hosi aldeia Kiubeselo ba postu Unidade Polísia Fronteira (UPF), Faotbasin, suku Bobometo, ezekuta hosi empreza Bannila Unipesoál, Lda, ho valór kontratu $291,009.18.

Reabilitasaun estrada rurál iha iha sub-rejiaun Nítibe no Pássabe, sei hahú hosi bairru Kusi, aldeia Hautefo, suku Ban-Afi, sub-rejiaun Nítibe, liga ba suku Malelat, sub-rejiaun Pássabe, ezekuta hosi empreza CP Unipesoál, Lda, ho valór kontratu $784,814.50.

Purtantu, manutensaun estrada rurál iha sub-rejiaun Pante Makassar, suku Naimeco sei hahú hosi aldeia Baqui sa’e ba Leolbatan, suku Costa, sei ezekuta hosi empreza Maferdi Unipesoál, Lda, ho valór kontratu $298,283.83.

Nia dehan, ba serbisu emerjénsia estrada rurál atu asesu dalan ba eskola filiál Mauimpena, suku Lalisuk, sub-rejiaun Pante Makassar, sei ezekuta hosi empreza Canarre Unipesoál, Lda, ho valór kontratu $48,404.83.

Manutensaun estrada rurál iha iha sub-rejiaun Nítibe sei hahú hosi suku Lela-Ufe, aldeia Mahata ba aldeia Hautefo, bairru Kusi, suku Ban-Afi, hodi liga ba sub-rejiaun Pássabe, sei ezekuta hosi empreza Am-Lhichoe Unipesoál, Lda, ho valór kontratu $162,173.89.

Nune’e mós serbisu emerjénsia ba jestaun inundasaun no moru gabiaun iha mota Saco, suku Bene-Ufe, sub-rejiaun Nitibe, sei gasta $147,042.71, projetu ne’e ezekuta hosi empreza Zero Quatro Unipesoál.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here