Objetu ilegál ne’ebé halo apreensaun hosi ekipa konjunta PNTL iha área Bobonaro. Imajen/mídia PNTL.

BOBONARO, 20 novembru 2021 (TATOLI) – Polísia Nasionál Timor-leste (PNTL) Munisípiu Bobonaro, sábadu ne’e halo apreensaun ba kilat-manu loloon ualu no fogete ilegál iha aldeia Tunubibi, suku Tapo-Memo, postu administrativu Maliana, munisípiu Bobonaro.

Komandu PNTL Munisípiu Bobonaro, lideradu Superintendente Antoninho Mauluta liuhosi membru forsa rezerva halo apreensaun bainhira hala’o atividade pasa-revista ba transporte públiku mikrolete diresaun Tunubibi, Maliana ne’ebe movimenta besik liña fronteira.

“Ita-nia membru hosi ekipa rezerva lidera hosi Ajente Xefe Angelino Barros hamutuk ho membru na’in-tolu halo patrullamentu la’o-ain ba Tunubibi, deskonfia karreta mikrolete ida ho xapa-matríkula 35.604 tula sasán ilegál, nune’e sira hapara kedas karreta refere hodi halo buska no konsege prende kilat manu marka Sharp Tiger hamutuk lolon ualu (8) no fogete hamutuk kaixa tolu iha karreta laran,” refere nota imprensa ne’ebé Agência Tatoli asesu iha sábadu ne’e.

Objetu hirak-ne’e daudaun ne’e Polisia Seksaun Investigasaun asegura hela iha kamandu inklui motorista inisiál AdA hodi kontinua submete ba prosesu investigasaun.

Enkuantu, Agência TATOLI rekolla informasaun seluk iha loron 19, tuku 10:30 kalan, katak ekipa konjunta komposta hosi Unidade Polísia Frobteira (UPF) no Komandu Operasaun Espesiál (COE, sigla portugés) detein sidadaun mane ida ho inisiál MD, orijen hosi aldeia Mabil-oa, suku Saburai, postu administrativu Maliana, ne’ebé tenta lori sigarru joker karón lima ultrapasa fronteira suku Memo. Ekipa konjunta kaptura iha suku Tapo-Memo, postu administrativu Maliana.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here