DILI, 19 novembru 2021 (TATOLI)—Diretór Ezekutivu Fundasaun Hadomi Timor (FHT), Abrão Monteiro hateten, sesta ne’e FHT hala’o enkontru ho Sekretáriu Estadu Komunikasaun Sosiál, Merício Juvinal dos Reis “AKARA”, hodi ko’alia kona-ba atividade kontinuasaun hanesan Programa Naroman ba Suku, Kombate HOAX no Promove Internet Saudavel, inklui apoia Estabelesimentu Podcast.
“Iha programa Naroman ba Suku, oinsa ami-nia ekipa bele enkaixa programa ruma iha programa Naroman ba Suku, ohin ami diskute ida-ne’e no hetan solusaun. Nune’e, Sekretáriu Estadu Komunikasaun Sosiál orienta ona ekipa hosi SEKOMS no Fundasaun Hadomi Timor atu prepara ona buat balun hodi bele konkretiza duni programa Naroman ba Suku,” Abrão Monteiro hateten ba Agência Tatoli, hafoin hala’o enkontru ho Sekretáriu Estadu Komunikasaun Sosiál, Merício Juvinal dos Reis “AKARA”, sesta ne’e.
Hosi enkontru ne’e, Fundasaun Hadomi Timor hakarak atu enkaixa programa rua iha laran hanesan formasaun ba utilizasaun meiu téknolojia iha suku no mós kria sistema jestaun suku nian ne’ebé hosi Fundasaun hakarak oferese ba suku liuhosi SEKOMS ba Programa Naroman ba Suku.
Aleinde ne’e, iha enkontru ne’e mós ko’alia kona-ba Internet Saudavél no oinsá atu bele kombate HOAX iha Timor-Leste.
“Ami mós iha hanoin, ita prezisa muda estratéjia ruma tanba ami akompaña durante ne’e SEKOMS sempre halo kampaña no iha inísiativu boot atu bele kombate HOAX, maibé ami haree katak ita presiza mós muda estratéjia balun. Tanba ne’e, ohin ami diskute no ami hakarak mós oinsá atu kontribui matadalan ka prodús video ruma ne’ebé ho nia konteudu pozitivu, atu nune’e bele fó mós informasaun di’ak ba katégoria ita ema-nian, liu-liu oinsá informasaun ne’e kria matadalan ka prodús vídeo ne’e ba i estudante, funsionáriu no inan-aman sira bele iha koñesimentu atu bele kontrola nia oan sira,” nia dehan.
Ho ne’e, Sekretáriu Estadu Komunikasaun Sosiál (SEKOMS), Merício dos Reis “AKARA” husu ba Fundasaun Hadomi Timor atu bele partisipa ativu ba iha kampaña internet saudavel no oinsá atu kombate HOAX.
Aleinde ne’e, Sekretária Estadu Komunikasaun Sosiál (SEKOMS) no Fundasaun Hadomi Timor mós ko’alia kona-ba Estabelesimentu Podcast ne’ebé hosi Fundasaun Hadomi Timor rasik ho inisiava kria no husu ba SEKOMS atu bele apoia Fundasaun Hadomi Timor ba Estabelesimentu Podcast.
Tanba, ho estabelesimentu podcast ne’e bele uza hanesan mídia ne’ebé di’ak hodi bele ba halo kampaña internet saudavel hodi bele kombate HOAX. Aleinde ne’e bele utiliza ba promove joven kreativu sira no joven sira-ne’ebé durante ne’e susesu ona iha parte ruma, tanba liuhosi podcast ne’e bele bolu no konvense sira, atu sira bele fó informasaun ba nia maluk joven sira atu banati tuir.
“Tanba, ita haree katak dadaun ne’e teknologia podcast ne’e mais ativu no detallu liu bainhira ita hakarak espresa saida mak ita-nia hakarak atu fó sai. Tanba dala barak ita utiliza mídia hanesan televizasaun sira lad’uun fó oportunidade barak ba ita-nia joven sira atu bele kontribui ideia no espresa sira-nia kapasidade ruma iha ne’ebá,” nia dehan.
Nune’e, intensaun atu estabelese podcast ne’e hodi SEKOMS mós bele monitór no bele utiliza sai hanesan meiu komunikasaun ne’ebé efetivu liu ba kampaña sira nomós oinsa atu fó koñesimentu ba joven sira, liuliu ba utiliza meiu téknolojia.
Jornalista : Nelia Fernandes
Editór : Cancio Ximenes
