Tasa AFF Suzuki Cup 2021. imajen/Espesial.

DILI, 19 outubru 2021 (TATOLI)– Adjuntu Sekretária Jerál Federasaun Futeból Timor-Leste (FFTL), Frederico Martins, informa, selesaun nasionál Timor-Leste hahú prepara ona fíziku no tékniku atu kompete iha jogu Asia Football Federation (AFF) Suzuki Cup 2021, ne’ebé abertura iha Singapura, iha fulan-dezembru ne’e.

“Foin lalais ita ba partisipa jogu kualifikasaun AFC nian ita la liu, maibé ita ba ho komposizaun hosi jogadór U-23 no jogadór senior balun hosi selesaun nasionál nune’e kontinua partisipa jogu AFF Suzuki Cup 2021.  Tanba haree ba ita nia vou aviaun ladun iha, mak ami buka meiu atu ita nia jogador sira hela nafatin hodi kontinua kompete ba jogu Suzuki Cup ne’ebé hala’o hosi AFF iha Singapura,” Adjuntu Sekretáriu Jerál FFTL ne’e hateten ba Agência TATOLI,iha edifísiu FFTL, Dili, sesta ne’e.

Nia dehan, autoridade Singapura autoriza jogadór selesaun nasionál Timor-Leste hela tan fulan-ida tanba hetan tulun hosi Vise Prezidente Asia Football Federation (AFF), Francisco Kalbuadi Lay.

Durante, iha Singapura, jogadór no treinadór sira kontinua hala’o treinamentu normál liuliu fizíku no tékniku atu kompete iha Suzuki Cup.

Joagadór sira hela besik estádiu Jalan Besar Singapura ne’ebé kompleta ho kampu treinu no fasilidade desportu.

“Ita hetan autorizasaun ami buka kedan fatin hela nian ne’ebé kompleta ho kampu treinu ba jogadór-sira iha estádiu jalan besar no laiha buat ida falla ba ita nia ekipa,” nia akresenta.

Viajen jogadór Timor-Leste antes ne’e ba Singapura hodi partisipa jogu kualifikasaun AFC hamutuk na’in-30, maibé jogu faze dahuluk ramata ona treinadór foku liu ba selesaun seniór, nune’e jogadór na’in-neen konsidera idade kiik liu fila ona mai Timor-Leste.

Nune’e, jogadór ne’ebé sei hela iha Singapura hodi partisipa jogu Suzuki Cup hamutuk jogadór na’in-24, kompostu hosi U-23 na’in-18 no senior na’in-neen, ne’ebé hetan apoiu finaseiru ba akomodasaun hosi FFTL.

“Ami iha difikuldade uitoan kona-ba orsamentu, maibé ami tenta hela atu rezolve atu ita nia ekipa hela nafatin iha ne’ebá to’o 30 novembru, tanba tuir regulamentu ne’e 01 dezembru foin tama ba Singapura, maibé ita hela kle’ur iha ne’ebá buat hotu ita mak prepara ho orsamentu kuaze $300.000 to’o jogu hotu,” nia esplika.

Jogu Suzuki Cup ne’e fahe ba grupu rua A no B, nune’e Timor-Leste  tama iha grupu A hamutuk ho Tailándia, Myanmar, Filipina, Singapura. Enkuantu grupu B, kompostu hosi Indonézia, Malázia, Laos, Cambodia no Vietnam.

Tuir oráriu jogu hahú iha 05 dezembru, Timor-Leste jogu hasoru Thailandia, kontra Myanmar iha 08 dezembru, kontra Filipina iha 11 dezembru no ikusliu Timor-Leste kontra Singapura iha 14 dezembru.

“Iha jogu faze grupu ne’e, ekipa rua mak sei utrapasa ba faze semi-finál no preparasaun hosi Timor-Leste ho másimu  ne’ebé garante sei partisipa to’o semi-finál,” Adjuntu Frederico Martins garante.

Jornalista : Hortencio Sanchez

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here