Logotipu La'o Hamutuk. Imajen/Espesiál

DILI, 18 novembru 2021 (TATOLI)—Organizasaun Naun Governamentál (ONG) La’o Hamutuk konsidera Orsamentu Jerál Estadu (OJE) 2022 fó projesaun despeza la sustentável ba tinan 2023, tanba Governu halo planu la tuir situasaun Timor-Leste nian.

“OJE fó projesaun despeza la sustentável ba tinan tuir mai. Governu halo planu despeza la tuir situasaun finanseiru Timor-Leste nian, prevee projesaun boot-liu iha momentu ne’ebé produsaun mina no gás atu ramata, fundu petrolíferu ameasa atu hotu no kapasidade ekonomia doméstiku seidauk forte atu sustenta nesesidade Estadu no Povu nian,” Peskizadora La’o Hamutuk, Eliziaria Febe Gomes, hateten liuhosi Konferénsia Imprensa ne’ebé halo iha nia knaar fatin, Bebora, Díli, ohin.

Tanba ne’e, La’o Hamutuk sujere atu Parlamentu Nasionál diskute kle’an ho Governu atu konsidera Timor-Leste nia situasaun finanseiru no ekonómiku antes deside dirasaun dezenvolvimentu ba future.

Nia dehan, Timor-Leste nian rezerva mina no gas kuaze konverte ona ba osan, ne’ebé agora investe hela iha merkadu finanseiru internasionál ne’ebé ninian flutuasaun labele kontrola, hosi Fundu Petrolíferu uitoan ne’ebé iha, sei mohu leet de’it kuandu la uza ho matenek hodi ajuda harii rekursu umanu ida-ne’ebé forte no harii setór produtivu ne’ebé sustentável iha rai laran.

“Nudár ezemplu, maske Governu atuál deklara atu halo avaliasaun ba planu harii projetu tasi mane ho nia komponente sira to’o agora ami seidauk haree prosesu avaliasaun maibé kontinua aloka osan hanesan tokon $1.5 iha 2022 no tokon $747 ba tinan haat (4) tuir mai, inklui alokasaun atu dezloka komunidade sira hosi fatin ne’ebé karik nunka hetan projetu foun,” nia dehan.

Presiza informasaun kompletu kona-ba impaktu hosi empréstimu, tanba to’o agora Governu Timor-Leste halo ona empréstimu totál liu tokon $500 no hosi empréstimu ida-ne’e presiza iha liután informasaun kona-ba planu klaru ba desimbolsu no planu atu halo tán diskusaun ba empréstimu foun.

“Proposta OJE 2022 introdús bareira ba empréstimu foun mak tokon $410. Ami sujere ba Parlamentu Nasional atu diskute kle’an kona-ba implikasaun hosi empréstimu ne’e ba tempu naruk Timor-Leste nian,” nia informa.

Tanba sistema orsamentu ‘Bazea ba Programa’ seida’uk la’o tuir objetivu no subar informasaun esensiál. La’o Hamutuk hanoin orsamentasaun bazea ba programa di’ak atu hametin sistema orsamentál, maibé bainhira entidade sira aloka atividade oi-oin ba kategoria programa sira la tuir realidade ka laiha konsisténsia bele hamenus transparénsia no falta atu lori benefísiu ba prosesu orsamentál.

“Nune’e ami sujere ba Parlamentu Nasionál atu diskute kle’an ho Governu hodi hadi’ak liután sistema orsamentasaun ne’ebé promove liután transparénsia no akuntabilidade no atu fornese informasaun kona-ba alokasaun ba kada órgaun no dirasaun Estadu nian,” nia dehan.

La’o Hamutuk husu tenke investe liu iha rekursu umanu hanesan edukasaun, saúde, bee-moos no agrikultura, tanba iha diferensa bo’ot entre narativa Governu nian sobre prioridade ba setór sosiál no ekonómiku no alokasaun sira, tanba iha proposta OJE 2022 Governu aloka de’it 17% hosi totál ba funsaun importante haat ne’e.

“Ami enkoraja atu deputadu/a sira diskute no hamutuk deside dirasaun orsamentál ne’ebé bazea ba realidade atuál no ajuda duni povu ne’ebé merese liu atu hetan tulun,” nia hateten.

Hosi ne’e, nia dehan, labele fó subsídiu ba funsionáriu públiku bainhira komunidade rurál barak enfrenta hamlaha.

“Ami nota katak planu oferese subsídiu tokon $25 ba funsionáriu iha kontradisaun ho objetivu ne’ebé Governu define atu alkansa seguransa ai-han, hadi’ak nutrisaun no promove agrikultura sustentável. Ami sujere atu Governu bele organiza ho ideia estratéjiku liu hodi oferese apoiu ba agrikultór sira duke funsionáriu públiku ne’ebé simu ona saláriu kada fulan. Ami hare erru no informasaun sala barak iha dokumentu OJE nian no husu Governu atu fó informasaun loos no PN atu konfirma dadus sira iha livru OJE 2022,” nia hateten.

Nu’udár ezemplu, tabela 12 iha livru 1 hateten tokon $40.2 sei aloka ba EDTL, E.P. iha 2022, maibé alokasaun loos ho montante tokon $90. Aleinde ne’e, tokon $0.4 ba BTL, E.P. maibé realidade hamutuk tokon $17. Total hosi tabela 12 mak sorin balun hosi alokasaun loos.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here