Ilustrasaun avaliasaun hakerek hosi alunu. Imajen/Nova Eskola

DILI, 18 novembru 2021 (TATOLI)–Estudante hamutuk 6.472 hosi eskola Ensinu Báziku Sentrál (EBS), Ensinu Báziku Filiál (EBF) no Ensinu Sekundáriu Jerál (ESJ) sei partisipa ezame pasajen klase ne’ebé sei realiza iha loron 22 to’o 27 novembru 2021.

Estudante 6.472 kompostu hosi Eskola EBF siklu 1,2 Fatu-meta, Eskola EBF Duque de Caxias Bemori, Eskola ESJ 04 Setembru UNAMET Balide, Eskola ESJ Nicolau Lobato Comoro, no Eskola ESJ 10 Dezembru Comoro.

Diretór Eskola ESJ 10 Dezembru Comoro, Calisto Guterres, hateten, parte eskola no estudante sira prepara ona atu hasoru etapa ne’e.

“Totál estudante ESJ 10 Dezembru atu tuir ezame pasajen klase hamutuk 588, kompostu hosi estudante 7o ano hamutuk 302 no estudante 8o ano hamutuk 286,” Diretór Eskola hateten ba Agência TATOLI, iha resintu eskola, Comoro, kinta ne’e.

Iha sorin seluk, Diretór Eskola ESJ 04 Setembru UNAMET Balide, Sérgio da Cruz, dehan, eskola ne’e rejista totál estudante atu tuir ezame pasajen klase hamutuk 3.000.

“Ami-nia preparasaun ba pontu ezame sira elabora ona, ne’ebé iha matéria hamutuk 13 mak estudante sira atu prienxe durante ezame. Espera estudante sira bele partisipa ho di’ak nune’e hetan rezultadu di’ak,” nia akresenta.

Nune’e mós, Koordenadór Eskola EBF siklu 1,2, Zacarias da Conceição, hateten, estudante ne’ebé sei tuir ezame pasajen klase ne’e hamutuk 1.300, ne’ebé konfirmadu ona katak estudante sira ho kondisaun di’ak partisipa ezame.

Enkuantu, Eskola ESJ Nicolau Lobato daudaun ne’e rejista ninia estudante hamutuk 952 mak sei partisipa ezame pasajen klase, inklui mós Eskola EBF Duque de Caxias Bemori iha estudante hamutuk 632.

Ba kestaun ne’e, Jornalista tenta konfirma Diretór Servisu Edukasaun Munisipál hosi Dili, Aileu, Ermera, Ainaru, Covalima, no Bobonaro atu hatene dadus jerál estudante sira ne’ebé sei partisipa ezame, maibé parte diresaun to’o agora seidauk simu dadus hosi diretór no koordenadór eskola sira.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here