Primeiru-Ministru, Taur Matan Ruak konvoka reuniaun Prezidente RAEOA-ZEESM,TL, Arsénio Paixão Bano. iha Palásiu Governu, kinta (21/01). Imajen TATOLI/Egas Cristovão

OÉ-CUSSE, 18 novembru 2021 (TATOLI) — Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, sei konvida Primeiru Minístru, Taur Matan Ruak, hodi hatuur fatuk dahuluk ba konstrusaun fatin istóriku turizmu kulturál iha Nunuheno, suku Cunha, sub-rejiaun Pante Makassar.

Objetivu konvida xefe Governu mai Oé-Cusse halo lansamentu primeira pedra, tanba fatin Nunuheno hanesan fatin istóriku dezde bei-ala sira envolve populasaun suku 18, bainbain uza ba serimónia kultura sunu-lilin, husu matak malirin iha fatin refere.

“Ha’u sei konvida Primeiru Minístru atu mai halo lansamentu, aban, sesta sei ba Díli halo audiénsia ho nia, sé Primeiru Minístru iha tempu sei mai halo lansamentu primeira pedra ba konstrusaun turizmu kulturál Nunuheno iha Oé-Cusse, ne’ebé sei lansa iha novembru ne’e,” Arsénio Paixão Bano informa ba Agência Tatoli iha Oé-Cusse, kinta ne’e.

Autoridade ne’e fó-sai katak, autoridade sei harii uluk kapela no lutu haleu, nune’e iha tinan oin, kontinua halo konstrusaun ba paizajen sira kompleta ho nia parke iha fatin ne’e, atu prioritiza fatin istóriku Nunuheno ne’e sai fatin serbí ba ema hotu.

“Tinan ida-ne’e autoridade halo konstrusaun uluk, tanba fatin halibur komunidade hosi suku 18, tanba fatin ba ema hotu hosi rai-boot nasaun viziñu sira mai sunu-lilin iha fatin ne’e, tanba fatin ne’e koñesidu, tanba envolve sé de’it inklui partidu, inan-aman, joven ne’ebé hakarak hetan grasa bensaun hosi bei-ala sira kuandu ba fatin dook,” nia informa.

Nune’e Autoridade RAEOA deside atu halo hadi’a fatin ne’e, tanba fatin ne’e halibur ema barak tantu Oé-Cusse nomoos rai boot inklui Timor Osidentál (NTT, sigla indonézia) no ema hosi Kefa mós mai sunu-lilin iha fatin ne’e.

Xefe suku Cunha, Domingos Seco Caunan, hatete, hanesan autoridade lokál iha suku Cunha, sei apoiu polítika autoridade atu transforma fatin ne’e sai fatin sagradu atu ema hotu simu matak-malirin

“Ha’u kontente kuandu autoridade iha inisíativa hodi hadi’a fatin ne’e sai fatin sagradu ema hotu, tanba fatin iha ha’u-nia suku, durante ita hotu observa, halibur ema barak mai halo serimónia kultura, entaun ita apoia autoridade tanba ne’e merese atu hadi’a,” lidér lokál ne’e orgullu.

Entretantu, projetu konstrusaun ne’e sei ezekuta hosi empreza Grand Enclave Unipesoál, Lda, ho valór kontratu $440,843.10, aloka hosi Orsamentu Jerál Estadu (OJE) 2021.

Notísia relevante: Autoridade RAEOA sei transforma Nunuhenu sai fatin istóriku

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here