SEJD ensera formasaun hospitalidade “Prepara foinsa’e hodi servisu ho kualidade” ba joven 40 ne’ebé tuir formasaun iha sentru formasaun East Timor Development Agency (EDTA). Imajen Tatoli/Nelia Fernandes.

DILI, 17 novembru 2021 (TATOLI)—Sekretáriu Estadu Juventude no Desportu (SEJD), kuarta ne’e ensera ona formasaun hospitalidade “Prepara foinsa’e hodi servisu ho kualidade” ba joven 40 ne’ebé durante ne’e tuir formasaun iha sentru formasaun East Timor Development Agency (EDTA).

Notísia Relevante: SEJD fasilita joven 40 tuir formasaun hospitalidade iha ETDA

“Atividade ne’e hanesan formasaun kontinuidade hosi tinan hirak liubá, Ita halo ona no foin dadauk ita lori joven hamutuk 40 mai tuir formasaun iha ne’e durante fulan tolu, no ohin ita ensera atividade ne’e,” Diretór Jerál, Sekretáriu Estadu Juventude no Desportu (SEJD), David Tomas de Deus, hateten ba jornalista sira iha ãmbitu enseramentu formasaun ba joven 40, iha sentru formasaun EDTA.

Kontinuasaun hosi formasaun ne’e, nia dehan, tanba formandu sira iha ona planu negósiu rasik ne’ebé sira aprezenta, entaun bainhira sira fila ba terrenu ne’e sira hahú ona implementa saida mak sira aprende durante ne’e, liuhosi sirania planu negósiu ne’ebé sira iha.

Hosi ne’e ba oin, SEJD atu fó apoia maibé ida-ne’e depende ba sirania programa, tanba SEJD lansa hela programa estimulu empreendedorizmuu sosiál ba apoia kreatividade joven sira nian, no hosi ne’e mak sei haree posibilidade ba oin liu-liu haree hosi atividade elijivél ne’ebé SEJD bele fó apoiu.

Maske formasaun termina ona, maibé SEJD nafatin kontinua enkoraja formandu sira liuhosi matenek no koñesimentu ne’ebé sira iha bele hahú daudaun ona atividade negósiu hodi dezenvolve iha sirania munisípiu.

Tanba, partisipante balun hateten katak sira rasik iha ona inisiativa hanesan tau ona osan hamutuk hodi hahú sirania negósiu, entaun bainhira sira hahú mak SEJD haree posibilidade bele fó apoiu atu bele kompleta saida mak sira hakarak halo iha sirania Munisípiu.

Diretór Sentru Formasaun East Timor Development Agency (EDTA), Januario Neto Mok, hateten atividade ba loron ohin hanesan enseramentu formasaun ba formandu 40 hosi munisípiu sia (9) inklui Díli.

“Sira formasaun iha ne’e durante fulan tolu no sira aprende iha área hospitalidade jerál, hanesan kulinária báziku, house keeping, food carving no custumer service, hosi ne’e ohin sira halo graduasaun,” nia dehan.

Tanba, nia dehan, iha loron 15-16 novembru EDTA halo kompetisaun ba abilidade ne’ebé durante sira aprende, hanesan atu teste sira iha área haat hanesan área kulinária, custumer servise, setting table, house keeping, food curving no bussines plan hosi rezultadu formasaun durante sira aprende iha sentru ne’e.

Nune’e, vensedór ba kompetisaun iha área haat ne’e hanesan food carving hosi munisípiu Baucau ho ema na’in-rua. Kompetisaun ne’e haree oinsá sirania abilidade arte hodi ko’a aifuan ho maneira tipu oioin tuir arte sira idakidak nian.

Vensedór ba área kulinária hosi munisípiu Bobonaro. Kompetisaun ne’e sira tein produtu lokál, hahú hosi hahan apetazer, entrada, hahan prinsipál no dizer, ida-ne’e sira uza produtu lokál. Hanesan hahan prinsipál sira halo ikan saboko, apetazer sira uza abokate lokál ho boek, entrada sira halo ho sopa lakeru, dizer ho pudin lakeru.

Vensedór ba área house keeping hosi munisípiu Lautém. Kompetisaun hanesan iha oras no minutu tolu, sira bele setting kama ho okaziaun depende ba kliente nian.

Vensedór ba área custumer servise hosi munisípiu Lautém. Iha kompetisaun ne’e, oinsá iha minut tolu sira lulun guardanapu ho tipu oioin no minutu lima sira ba setting meza depende okaziaun ba hahan nian. Nune’e, iha minutu ualu, sira tenke kompleta ona meza no oinsá sira transfere hahan hosi dapur mai iha restaurante no sira direta serve kliente.

Nune’e, kritériu avaliasaun ba kompetisaun hanesan formandu 40 tenke iha ijiéne pesoál, servisu tuir tempu, servisu tuir estandar no sirania atitude servisu, sira komprende saida mak sira halo atu nune’e esplika ba juri sira. Alende ne’e, haree mós sirania tim, hanesan oinsá sirania servisu iha ekipa.

Iha kompetisaun ne’e, juri hamutuk na’in13 ne’ebé mai ho esperiénsia iha área haat.

Formanda, Manuela Freitas, hosi Sentru Juventude munisípiu Baucau, sente kontente bele tuir formasaun iha EDTA no hosi formasaun ne’e, ninia ekipa hetan vensedór iha área food carving.

“Ami sente orgullu, kontente no agredese tebes tanba durante fulan tolu ami tuir formasaun iha ne’e hodi reprezenta munisípiu Baucau. Tanba ne’e, hanesan buat foun ne’ebé ami aprende durante fulan tolu nia laran ohin bele atinji duni. Maske defisil maibé ami sente kontente bainhira ami hetan rezultadu ho primeiru lugar,” nia dehan.

Maske nune’e, ho rezultadu formasaun ne’e, nia parte ho ekipa sei implementa ba iha munisípiu Baucau atu nune’e bele dezenvolve área hospitalidade jerál iha munisípiu Baucau.

Entretantu, vensedór ba kompetisaun iha área haat, ohin simu premiu hanesan fugaun, mixer, blender, tudik box ho tasa hosi sana rai.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here