Progresu konstrusaun Jardín 59 iha Viqueque, kuarta (17/11). Imajen TATOLI/Vitorino Lopes da Costa

VIQUEQUE, 17 novembru 2021 (TATOLI)-Diretór Planu Integradu Dezenvolvimentu Munisípiu (PIDM), Domingos de Carvalho, informa, progresu konstrusaun jardín 59 atinje 30% no morru haleu administrasaun munisípiu Viqueque atinje 18%.

“Progresu ba morru tenke atinje 58% no jardín 59 atinje 40% mak bele halo pagamentu, maibé realidade morru foin atinje 18%. Ha’u haree jardín maka bele, ne’ebé fulan-novenbru ne’e ramata, kompañia bele atinje ona 40% ba leten,” Diretór PIDM hateten ba Agência TATOLI, iha ninia kanar fatin, Administrasaun Viqueque, kuarta ne’e.

Tanba ne’e, Diretór ne’e husu kompañia sira tenke esforsu-an tanba ekipa PIDM sei ba verifika molok halo pagamentu.

“Ami kontinua halo kontrolu ba kompañia nia serbisu iha terrenu,” nia akresenta.

Konstrusaun jardín 59 no morru hahú iha loron 15 setembru 2021, ho durasaun serbisu fulan-rua resin, ne’ebé ba jardín 59 toma konta hosi kompañia Peaceful Unip. Lda, enkuantu morru husi kompañia Darda Unip, Lda.

Orasamentu ba jardín ho plafon validasaun hosi Ajénsia Nasionál Dezenvolvimentu (ADN) hamutuk $273.301,49 no morru $ 233.346,66.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here