Responsável Vasina Sentru Saúde Hohorem, Marito do Costa. Imajen/Xefe Suku Fohorem: Fernando Ferreira.

COVALIMA, 17 novembru 2021 (TATOLI)—Psoál Saúde Covalima lori vasina buka komunidade iha to’os atu fó vasina hodi prevene no kombate transmisaun COVID-19 iha postu administrativu Fohorem, munisípiu Covalima. 

Notísia Relevane: PM fó parabéns tanba taxa vasinasaun Covalima okupa segundu lugar

“Ami buka tuir komunidade iha to’os, bazea ami halo atividade tama uma-sai uma. Bainhira  ami to’o iha aldeia Fatuk Laran, suku Fohorem, ami rona informasaun katak ema halibur malu iha Xefe Suku nia to’os. Entaun, ami tuir sira ba iha to’os, nune’e bele fó vasina ba sira,” Responsável Vasina Sentru Saúde Fohorem, Marito da Costa, informa ba jornalista sira via telefónika, kuarta ne’e. 

Razaun pesoal saúde sira buka komunidade iha to’os, tanba sira hakarak komunidade postu administrativu Fohorem tenke vasina hodi kontra COVID-19, tanba komunidade balun vasina ona doze dahuluk no seidauk kompleta doze daruak, balun seidauk vasina nune’e pesoál saúde buka tuir komunidade iha to’os. 

“Ami hakarak komunidade postu Fohorem tenke vasina, aumenta imunidade hodi kontra COVID-19,” nia dehan.

Xefe Suku Fohorem, Fernando Ferreira, apresia ba ervisu hosi pesoál saúde sira tanba sira  hala’o servisu bazea ba orientasaun hosi Governu hodi kolabora ho autoridade lokál hodi prevene COVID-19 liuhosi vasina.

Pesoál saúde sira buka tuir komunidade iha to’os, tanba pesoál saúde sira to’o iha aldeia Fatuk Laran ne’e komunidade ba hotu toos, nune’e pesoál saúde sira tuir sira ba to’os hodi identifika komunidade ne’ebè maka seidauk vasina no balun seidauk kompleta doze daruak, atu simu vasina. 

“Ha’u nudar autoridade apresia servisu hosi pesoál saúde sira esforsu buka komunidade sira to’o iha to’os atu fó vasina, tanba sira hakarak komunidade livre hosi COVID-19,” nia hateten 

Bazea ba dadus hosi Centru saúde Fohorem, komunidade Postu Administrativu Fohorem 90% mak vasina ona. 

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here