Kopa AFO, ekipa FC Zinter 'dere' FC Fini ho 3-1 iha 16 finál. Imajen Tatoli/Abílio Elo Nini.

OÉ-CUSSE, 16 novembru 2021 (TATOLI) — Ekipa hosi klubu Zinter FC halakon ekipa jogadór hosi klubu FC Fini iha Kopa Asosisiasaun Futeból Oé-Cusse (AFO) sub-22 ho rezultadu 3-1 iha 16 finál.

Jogu 16 finál ne’e realiza iha Kampu Futeból Oébau, iha tersa loraik ne’e, Zinter FC ofisialmente lidera provizóriu hodi hakat ba 8 finál hasoru klubu FC Binipu iha semana oin.

Jogu ne’e hahú iha primeira parte ho tempu minutu 45, ekipa rua hatudu jogu forsa hanesan, maske jogu ho kualidade no konsege fó ameasa ba guarda maibé la rezulta golu ruma durante primeira parte. Nune’e durante menutu 45 ho rezultadu 0-0.

Purtantu hakat fali ba jogu segunda parte iha minutu 52, ekipa FC Zinter lansa golu dahuluk liuhosi jogadór Dino Fraz ho númeru kamizola 18 hodi hatuur score ba 1-0.

Ho rezultadu ne’e lori sorte di’ak ba ekipa FC Zinter to’o de’it minutu 59, jogadór Nazario Abi ho númeru kamizola 10 lansa-tán golu hodi muda score ba 2-0.

Tanba muda score ne’e, halo ekipa jogadór FC Zinter hatudu jogu maka’as liután hahú hatudu vontade no sólidu to’o de’it minutu 63 jogadór Dino Fraz lansa-tán golu ida hodi muda score ba 3-0.

Purtantu iha minutu 72 ekipa FC Fini liuhosi jogadór Rui Fernando Nunes ho númeru kamizola 19 lansa golu ida, nune’e iha jogu segunda to’o remata parte ekipa rua hatuur score ba 3-1 hodi termina jogu ne’e.

Ho susesu FC Zinter nian, treinadór FC Fini, Fernando Coa, fó parabéns ba ekipa susesu tanba durante jogu la’o ekipa rua hatudu disipliña di’ak.

“Ami lakon iha fíziku tanba jogadór sira ita haree labarik kiik hotu, depois domina bola seidauk, ida-ne’e maka ami-nia frakeza ne’ebé hodi ami lakon, maibé lakon ida-ne’e la hamate ami-nia vontade, ami sei kontinua hadi’a ami jogu iha jogu tuir mai, no agradese ba ekipa manán sira, maski ami lakon maibé jogu ne’e la’o di’ak tuir regulamentu nian,” nia agradese

Treinadór FC Zinter, Nilton Boquifai, hatete, nu’udar treinadór fó parabéns ba ekipa rua ne’e, tanba hatudu sira jogu di’ak iha kampu laran.

“Ami-nia klubu FC Zinter manán 3-1, maibé ami haree iha fallansu barak presiza hadi’a ba jogu tuir mai, tanba sei hakat-tán ba 8 finál iha semana oin,” nia katak

Nune’e tuir kalendáriu ekipa FC Zinter sei hasoru Ekipa Binipu FC iha jogu semana oin. Entretantu, jogu ho durasaun minutu 90 ne’e lidera hosi árbitru, Rodrigo Pereira, ho nia asistente dahuluk Octaviano da Cruz, no asistente daruak Minguel Colo.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here