Prezidente Repúblika, Francisco Guerres Lú Olo ho nia espoza Cidalia Nobre Lopes Mouuzinho Guterres presta omenajen ba Don Boaventura hodi simu buua no malus hos ilia-na’in sira atu hetan matak malirin hosi bei’ala sira liu-liu hosi Don Bonventura. Imajen/Mídia PR.

MANUFAHI, 16 novembru 2021 (TATOLI)—Prezidente Republika (PR), Francisco Guterres Lú Olo, fó omenajen ba Don Boaventura hodi simu bua no malus hosi lia-na’in sira no atu hetan matak malirin antes hala’o diálogu ho populasaun iha Manufahi.

Notísia Relevante: Prezidente Repúblika sei hala’o diálogu ho komunidade iha Manufahi-Ainaro

Prezidene Repúblika, Francisco Guterres Lú Olo ho nia Espoza Cidalia Nobre Lopes Mouzinho Gterres ho komitiva vizita Manuufahi. Imajen/Mídia PR.

“Don Boaventura nia istoria ita hotu rona, ita hotu hatene. Ha’u la’ós primeiravez mak mai iha Don Boaventra nia fatin, maibé uluk kedas seidauk halo no harii monumentu ida-ne’e,” Prezidente Repúblika hateten ba jornalista sira iha Monumentu Don Boaventura Luak, Same, Manufahi, tersa ne’e.

Xefe Estadu relembra nia parte tama tiha kedas iha uma Don Boaventura ninian, hodi presta omenajen ba ninia pasadu ne’ebé mak hola parte ba istória Timor-Leste nian.

“Ha’u hanoin simu bua-malus ne’e simbolika liu. Nia hatene katak kuandu ita simu bua-malus ne’e signifika katak simu matak malirin hosi bei’ala sira,” nia dehan.

Xefe Estadu ne’e hatutan, Don Boaventura nia pasadu hamutuk ho bei’ala, avó sira lori povu Manufahi ninian, hamriik hasoru kolonializmu portugés ne’ebe mak hanehan povu Timor-Leste.

Prosesu luta hirak ne’e hotu ba indepedénsia rai ida-ne’e, hatudu katak povu Timor-Leste ida ke asswa’in tebes no povu Manufahi nia kontribuisaun barak mós ba libertasaun ida-ne’e.  

Ho razaun hirak ne’e mak Xefe Estadu mai vizita Manufahi hodi presta omenajen ba sira hotu ne’ebe mak mate iha funu laran hodi fó sira-nia vida ba liberdade, ne’ebe simu bua-malus ne’e simbolika liu katak simu matak malirin hosi bei’ala sira liu-liu hosi Don Bonventura nian.

Prezidente Komisaun Organizadór, Trinito Trindade, hateten komunidade Same-Manufahi kontente no agradese ba vizita Prezidente Repúblika ho nia espoza, ho ninia komitiva tomak.

“Ha’u hanoin vizita Prezidente Repúblika nian mai iha munisípiu Manufahi la’ós vizita urjente ida no la’ós vizita surpreza ida, maibé vizita ne’e tuir loloos akontese tiha ona iha fulan marsu tinan ne’e”, nia dehan.

Razaun Xefe Estadu la realiza vizita iha tempu ne’ebá tanba situasaun pandemia COVID-19, maibé ohin loron realiza vizita ne’e ho objetivu diálogu ho entidade hotu-hotu hodi rona preokupasaun oioin no sujestasaun balun hosi komunidade hodi relata ba Governu atu tau ba konsiderasaun.

Hatán kona-ba preparasaun ba vizita hosi Xefe Estadu, nia esplika kada ema ida-idak ka grupu estruturadu mantein nafatin ninia responsabildade atu simu vizita Prezidente Repúblika ne’e bele la’o ho susesu.

Responsável ne’e relembra, Prezidente Repúblika liuhosi Xefe Kaza Sívil vizita ona fatin lubuk ida mak hanesan grupu profisionál, eskola sira, orfonatu, no momentu ne’ebá Prezidente Repúblika labele realiza ninia vizita tanba ho razaun saúde.

Prezidente Republika, Francisco Guterres Lú Olo, kuda ai-oan iha Parke Don Boaventura iha Luuak-Manufahi. Imajen/Mídia PR.

Prezidente Repúblika, Francisco Guterres Lú Olo, ho nia Espoza Cidalia Nobre Lopes Mouzinho Guterres, tersa ne’e realiza vizita traballu iha munisipiu Manufahi ho objetivu halo diálogu ho autoridade lokál, sosiedade sivil, veteranu, konfisaun relijioza ho foinsa’e sira hodi esplika kona-ba situasaun polítika rai-laran no rona preokupasaun sira hosi komuunidade.

Bazea ba oráriu, aban (kuarta, 17 novembru), Xefe Estadu sei realiza diálogu ho entidade sira iha salaun Igreja Manufahi.

Tuir observasaun jornalista TATOLI iha terrenu katak, Xefe Estadu ho nia komitiva tomak sai hosi kapital Dili iha tuku 08:00 OTL dadeersan liuhosi dalan foun Maleuana nian, Prezidente Repúblika ho ninia ekipa deskansa uitoan iha Maubisse iha oras balun nia laran, hafoin kontinua viajen ba Manufahi.

Iha vizita ne’e, komunidade Manufahi hanesan lia-na’in, estudante sira, autoridade lokál, autoridade munisipál, autoridade seguransa no Defeza, simu Xefe Estadu ho nia espoza iha área Leusuati, baliza entre munisipiu Ainaro no Manufahi.

Bainhira ramata liafuan Bem-Vindu hosi reprezentante ho tara tais, Xefe Estadu kontinua halo ninia viajen ba iha parke Don Boaventura hodi presta omenajen ba saudozu sira iha ossouáriu iha Luak-Manufahi.

Intensaun vizita ne’e, atu simu matak malirin hosi mahein sira hamulak hodi entrega bua-malus ba Prezidente Republika, Francisco Guterres Lú Olo, ho nia espoza nomós komitiva sira, no simbolikamente Xefe Estadu mós kuda ai-oan iha parke Dom Boaventura.

Jonalista : Domingos Piedade Freitas

Editór     : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here